అఖిల్ ‘లెనిన్’కు ఇంకా 25 రోజుల షూట్... రిలీజ్ డేట్ క్లారిటీ ఎప్పుడంటే?

అఖిల్ అక్కినేని నటిస్తున్న లేటెస్ట్ మూవీ లెనిన్ ప్రస్తుతం షూటింగ్ దశలో ఉంది. ఈ సినిమాకు ముందుగానే రెండు విడుదల తేదీలను ఆలోచనలో పెట్టుకున్నారు. రామ్ చరణ్ నటిస్తున్న ‘పెద్ది’ సినిమా విడుదల కాకపోతే మే 1 న ‘లెనిన్’ రిలీజ్ చేయాలని, అదే పెద్ది వస్తే జూన్ 26 కు వాయిదా వేయాలని ప్లాన్ చేస్తున్నారు. అయితే ఇప్పటికీ ఈ సినిమాకు దాదాపు 25 రోజుల షూటింగ్ మిగిలి ఉన్నట్లు సమాచారం.

మిగిలిన షెడ్యూల్‌లో ఒక భారీ ఫైట్ సీక్వెన్స్‌తో పాటు పాటలు ఉన్నాయి. ముఖ్యంగా ఆ ఫైట్ సీన్‌కే పది రోజులకు పైగా సమయం పడుతుందని టాక్. అంటే, ‘పెద్ది’ కి ఎంత వర్క్ బకాయి ఉందో, ‘లెనిన్’ కూ దాదాపు అంతే పని మిగిలి ఉంది. అయినప్పటికీ కొన్ని కారణాల వల్ల ‘పెద్ది’ తో పోలిస్తే ‘లెనిన్’ పరిస్థితి కొంచెం కంఫర్టబుల్‌గా ఉందని ఇండస్ట్రీలో చర్చ జరుగుతోంది.

వచ్చే నెల తొలి వారం వరకు పరిస్థితిని గమనించి, ఆ తర్వాత ‘లెనిన్’ ప్రమోషన్లను మొదలుపెట్టే అవకాశం ఉంది. ఈ చిత్రాన్ని నాగార్జున నిర్మిస్తుండగా, సితార నాగవంశీ సమర్పిస్తున్నారు. ఈ సినిమాలో అఖిల్ తొలిసారిగా గ్రామీణ నేపథ్యంతో, రగ్గడ్ లవ్ స్టోరీలో కనిపించనుండటం ప్రత్యేక ఆకర్షణగా నిలుస్తోంది.