హిజాబ్ ధరించడం ఇస్లాంలో తప్పనిసరి కాదు..! అలహాబాద్ హైకోర్టు కీలక తీర్పు

పాఠశాల యూనిఫామ్‌తో పాటు హిజాబ్ లేదా తలపై స్కార్ఫ్ ధరించేందుకు అనుమతించాలని కోరుతూ ముస్లిం విద్యార్థిని దాఖలు చేసిన పిటిషన్‌ను అలహాబాద్ హైకోర్టు కొట్టివేసింది. తరగతి గదిలో హిజాబ్ ధరించడం ఇస్లాంలో తప్పనిసరి మతపరమైన ఆచారం అని నిరూపించేందుకు పిటిషనర్ తగిన ఆధారాలు సమర్పించలేదని జస్టిస్ జేజే మునీర్, జస్టిస్ ఇందర్‌జీత్ శుక్లాలతో కూడిన ధర్మాసనం పేర్కొంది. ఆగస్టు 21న వెలువరించిన తీర్పులో, మహిళలు తలపై స్కార్ఫ్ ధరించడం ఇస్లాంలో అత్యవసరమైన మతపరమైన ఆచారం కాదని గతంలో పలు హైకోర్టులు పేర్కొన్న విషయాన్ని కూడా ధర్మాసనం ప్రస్తావించింది.

విద్యాసంస్థలు సమానంగా, వివక్ష లేకుండా అమలు చేసే డ్రెస్ కోడ్‌ను నిర్ణయించే అధికారం పాఠశాల యాజమాన్యానికి ఉంటుందని హైకోర్టు స్పష్టం చేసింది. కర్ణాటక హైకోర్టు హిజాబ్‌పై ఇచ్చిన తీర్పు కూడా ఈ కేసులో మార్గదర్శకంగా ఉందని పేర్కొంది. పిటిషనర్ ప్రయాగ్‌రాజ్‌లోని టాగోర్ పబ్లిక్ స్కూల్‌లో విద్యార్థిని. ఆరో తరగతి నుంచి హిజాబ్ ధరిస్తున్నప్పటికీ, 11వ తరగతిలో పాఠశాల యాజమాన్యం అభ్యంతరం వ్యక్తం చేసిందని ఆమె పేర్కొన్నారు. అయితే గతంలో అనుమతించినందున భవిష్యత్తులోనూ అదే విధానాన్ని కొనసాగించాల్సిన చట్టపరమైన బాధ్యత పాఠశాలకు లేదని కోర్టు స్పష్టం చేస్తూ పిటిషన్‌ను కొట్టివేసింది.