మెస్సీ ప్రాక్టీస్ వీడియోలో తెలుగు పాట.. ఇంటర్ మయామిలో ‘జిమ్ జిమ్ తార’ హంగామా

తెలుగు జానపద పాట ‘జిమ్ జిమ్ తార’ ప్రస్తుతం సోషల్ మీడియాలో ట్రెండింగ్‌లో నిలుస్తోంది. రాయలసీమలోని కర్నూలు ప్రాంతానికి చెందిన గోకుల లక్ష్మీదేవి, సోషల్ మీడియాలో ‘లక్ష్మీ ఆంటీ’గా గుర్తింపు పొందిన ఆమె పాడిన ఈ పాట డీజే రీమిక్స్ వెర్షన్‌తో యువతను ఆకట్టుకుంటోంది. ఇన్‌స్టాగ్రామ్ రీల్స్, యూట్యూబ్ షార్ట్స్‌లో ఈ పాటకు అనేక మంది డ్యాన్స్ వీడియోలు రూపొందించడంతో తెలుగు రాష్ట్రాలను దాటి దేశవ్యాప్తంగా వైరల్‌గా మారింది. తాజాగా అమెరికాకు చెందిన ప్రముఖ ఫుట్‌బాల్ క్లబ్ ఇంటర్ మయామి తన అధికారిక ఇన్‌స్టాగ్రామ్ పేజీలో పంచుకున్న ప్రాక్టీస్ వీడియోలో ఈ పాట వినిపించడంతో తెలుగు నెటిజన్లు ఆశ్చర్యానికి గురయ్యారు.

ప్రపంచ ఫుట్‌బాల్ స్టార్ లియోనెల్ మెస్సీ ప్రాతినిధ్యం వహిస్తున్న ఇంటర్ మయామి వీడియోలో తెలుగు పాట వినిపించడం అభిమానుల్లో ఆసక్తిని పెంచింది. క్లబ్ అధికారిక ఇన్‌స్టాగ్రామ్ ఖాతాకు భారీ సంఖ్యలో ఫాలోవర్లు ఉండటంతో ఈ వీడియో తెలుగు పాటకు అంతర్జాతీయ స్థాయిలో గుర్తింపు తెచ్చిపెట్టినట్లయింది. ‘జిమ్ జిమ్ తార’ పాటపై నెటిజన్లు సరదా కామెంట్లు చేస్తూ తమ ఆనందాన్ని వ్యక్తం చేస్తున్నారు. స్థానిక జానపద సంగీతం సోషల్ మీడియా ద్వారా ప్రపంచవ్యాప్తంగా ఉన్న ప్రేక్షకులను చేరుకోగలదనే విషయానికి ఈ పరిణామం ఉదాహరణగా నిలుస్తోంది.