తెలంగాణలో ఐదు జిల్లాలకు భారీ వర్ష హెచ్చరిక..

తెలంగాణ రాష్ట్రంలో గురువారం భారీ వర్షాలు కురిసే అవకాశం ఉందని హైదరాబాద్ వాతావరణ కేంద్రం హెచ్చరించింది. ఈ నేపథ్యంలో ఆదిలాబాద్, కుమురంభీం ఆసిఫాబాద్, మంచిర్యాల, నిర్మల్, నిజామాబాద్ జిల్లాలకు ఎల్లో అలర్ట్ జారీ చేసింది. ఈ జిల్లాల్లో అక్కడక్కడ భారీ వర్షాలు కురిసే అవకాశముందని పేర్కొంది. అలాగే ఈ నెల 28వ తేదీ వరకు రాష్ట్రంలోని పలు ప్రాంతాల్లో తేలికపాటి నుంచి మోస్తరు వర్షాలు కురిసే అవకాశం ఉందని వెల్లడించింది.

ఇదిలా ఉండగా, ప్రభుత్వ గణాంకాల ప్రకారం రాష్ట్రంలోని 24 జిల్లాల్లో ఇప్పటికీ లోటు వర్షపాతం నమోదైంది. ఇటీవల కురిసిన వర్షాల్లో రంగారెడ్డి జిల్లా నందిగామలో అత్యధికంగా 5.9 సెంటీమీటర్ల వర్షపాతం నమోదైంది. వర్షాల నేపథ్యంలో ప్రజలు అప్రమత్తంగా ఉండాలని, వాతావరణ శాఖ సూచనలను పాటించాలని అధికారులు సూచిస్తున్నారు.