మాజీ మంత్రి యనమల రామకృష్ణుడికి అస్వస్థత

మాజీ మంత్రి, తెలుగుదేశం పార్టీ సీనియర్ నేత యనమల రామకృష్ణుడు స్వల్ప అస్వస్థతకు గురయ్యారు. దీంతో ఆయనకు కాకినాడలోని ట్రస్ట్ ఆస్పత్రిలో వైద్యులు చికిత్స అందిస్తున్నారు. ఇటీవల ఆయనకు గుండె శస్త్రచికిత్స జరిగిన విషయం తెలిసిందే. ఈ క్రమంలో ఆయనకు అమర్చిన స్టంట్‌లో స్వల్ప సమస్య తలెత్తడంతో అస్వస్థతకు గురైనట్లు సమాచారం. వైద్యులు వెంటనే చికిత్స అందించడంతో ఆయన ఆరోగ్యం మెరుగుపడింది. అనంతరం ఐసీయూ నుంచి సాధారణ వార్డుకు తరలించారు. ప్రస్తుతం వైద్యుల పర్యవేక్షణలో ఆయనకు చికిత్స కొనసాగుతోంది.

యనమల రామకృష్ణుడు ఆరోగ్య పరిస్థితిపై ముఖ్యమంత్రి చంద్రబాబు నాయుడు ఆరా తీశారు. ఆయన కుటుంబ సభ్యులకు ఫోన్ చేసి ఆరోగ్య పరిస్థితి గురించి వివరాలు తెలుసుకున్నారు. యనమల ఆరోగ్యానికి సంబంధించిన సమాచారాన్ని ఎప్పటికప్పుడు తనకు తెలియజేయాలని టీడీపీ నేతలను ముఖ్యమంత్రి ఆదేశించారు. ఈ నేపథ్యంలో ఎంపీ సానా సతీశ్ ట్రస్ట్ ఆస్పత్రికి వెళ్లి యనమలకు చికిత్స అందిస్తున్న వైద్యులతో మాట్లాడారు. అనంతరం యనమల ఆరోగ్య పరిస్థితి గురించి ముఖ్యమంత్రికి వివరించారు.