ఏఐ ఏజెంట్లతో షాపింగ్ చేసేలా వాల్‌మార్ట్ కొత్త టూల్స్

ఆర్టిఫిషియల్ ఇంటెలిజెన్స్‌ (ఏఐ) ఏజెంట్ల ద్వారా వినియోగదారులు షాపింగ్ చేయడంతో పాటు కొనుగోళ్లను పూర్తి చేసుకునేలా వాల్‌మార్ట్‌ కొత్త టూల్స్‌ను ప్రవేశపెట్టింది. ఇందులో భాగంగా వచ్చే నెల నుంచి ‘ఏజెంట్ ప్రొఫైల్స్‌’ ఫీచర్‌ను అందుబాటులోకి తీసుకురానుంది. దీని ద్వారా వినియోగదారులు తమ తరఫున షాపింగ్ చేసే ఏఐ ఏజెంట్లకు అనుమతి ఇవ్వవచ్చు. వాటి ద్వారా జరిగిన కొనుగోళ్లను విడిగా పరిశీలించడంతో పాటు ఖర్చులకు పరిమితులు విధించవచ్చు. ప్రతి లావాదేవీకి తమ ఆమోదం తప్పనిసరి చేసే అవకాశం కూడా ఉంటుంది. అవసరమైతే ఏఐ ఏజెంట్లకు ఇచ్చిన అనుమతులను ఎప్పుడైనా రద్దు చేసుకోవచ్చు.

అలాగే, ఓపెన్‌ఏఐకి చెందిన చాట్‌జీపీటీ, గూగుల్‌ జెమినీ, మెటా మ్యూస్‌ వంటి ఏఐ అసిస్టెంట్లు వాల్‌మార్ట్‌, సామ్‌స్‌ క్లబ్‌ వ్యవస్థలతో అనుసంధానమై ఉత్పత్తులను వెతకడానికి, కొనుగోళ్లను పూర్తి చేయడానికి వీలు కల్పించే ‘వాల్‌మార్ట్‌ ఏజెంట్‌ గేట్‌వే’ ప్లాట్‌ఫామ్‌ను కూడా సంస్థ ప్రారంభించింది. కొనుగోళ్లపై తుది నియంత్రణ వినియోగదారులదేనని వాల్‌మార్ట్‌ స్పష్టం చేసింది. ఏఐ ఏజెంట్లకు చెల్లింపు కార్డుల వివరాలను యాక్సెస్‌ చేసే అవకాశం ఉండదని, సంస్థ నిబంధనలను ఉల్లంఘిస్తే వాటిని నిరోధించవచ్చని తెలిపింది. ఈ టూల్స్‌ను వాల్‌మార్ట్‌ ఖాతా ఉన్న వారందరూ ఉపయోగించుకోవచ్చు; ఇందుకు వాల్‌మార్ట్‌ ప్లస్‌ సభ్యత్వం అవసరం లేదు. ఏఐ ఆధారిత ఆన్‌లైన్‌ షాపింగ్‌ రంగంలో తన స్థానాన్ని బలోపేతం చేసుకునే దిశగా వాల్‌మార్ట్‌ ఈ చర్యలు చేపట్టింది.