ఓటరు జాబితాలపై ఎన్నికల సంఘం కీలక నిర్ణయం

దేశవ్యాప్తంగా 17 రాష్ట్రాలు, కేంద్రపాలిత ప్రాంతాల్లో ఓటరు జాబితాల ప్రత్యేక సవరణ చేపట్టాలని భారత ఎన్నికల సంఘం (ఈసీ) నిర్ణయించింది. వచ్చే ఏడాది అసెంబ్లీ ఎన్నికలు జరగనున్న రాష్ట్రాల్లోనూ ఈ ప్రక్రియను అమలు చేయనుంది. 2027 జనవరి 1వ తేదీని అర్హత తేదీగా నిర్ణయించింది. ఓటరు జాబితాలను మరింత కచ్చితంగా రూపొందించడం, అర్హులైన ప్రతి ఒక్కరికీ ఓటు హక్కు కల్పించడం ఈ ప్రక్రియ ప్రధాన ఉద్దేశం.

ముఖ్యంగా 18 ఏళ్లు నిండిన యువత, తొలిసారి ఓటు హక్కు పొందే వారిని ఓటరు జాబితాలో చేర్చడంతోపాటు, ఇప్పటికే ఉన్న జాబితాల్లో తప్పులు, వివరాల్లో మార్పులు, ఇతర లోపాలను సరిదిద్దేందుకు ఈసీ చర్యలు చేపట్టనుంది. అర్హులైన ఓటర్లు తమ వివరాలను పరిశీలించుకుని, అవసరమైన సవరణలు చేసుకునే అవకాశం కల్పించనుంది. ఈ ప్రక్రియ ద్వారా రానున్న ఎన్నికల కోసం ఓటరు జాబితాలను మరింత సమగ్రంగా, పారదర్శకంగా రూపొందించాలని ఎన్నికల సంఘం లక్ష్యంగా పెట్టుకుంది.