డీబీటీతో నిధుల లీకేజీలకు అడ్డుకట్ట: ప్రధాని మోదీ

మొబైల్‌ నంబర్లతో అనుసంధానమైన బ్యాంకు ఖాతాలకు ప్రత్యక్ష నగదు బదిలీ (డీబీటీ) ద్వారా రూ.50 లక్షల కోట్లను జమ చేశామని, తద్వారా దళారుల చేతుల్లోకి వెళ్లే రూ.5 లక్షల కోట్లను ఆదా చేయగలిగామని ప్రధాని నరేంద్ర మోదీ తెలిపారు. దిల్లీలో గురువారం టెలికం శాఖ, సెల్యులార్‌ ఆపరేటర్స్‌ అసోసియేషన్‌ ఆఫ్‌ ఇండియా సంయుక్తంగా నిర్వహించిన ఇండియా మొబైల్‌ కాంగ్రెస్‌ (ఐఎంసీ) 2026 కార్యక్రమంలో ఆయన ప్రసంగించారు. గతంలో సంక్షేమ పథకాల నిధుల పంపిణీలో లీకేజీలు జరిగేవని, డీబీటీ ద్వారా నేరుగా లబ్ధిదారుల ఖాతాలకు డబ్బు చేరుతోందని చెప్పారు. పీఎం-కిసాన్‌ సమ్మాన్‌ నిధి పథకం కింద రైతులకు ఇప్పటివరకు రూ.4 లక్షల కోట్లకు పైగా బదిలీ చేసినట్లు వివరించారు. అక్రమాలకు అడ్డుకట్ట వేయడంలో వెనక్కి తగ్గబోమని స్పష్టం చేశారు.

సైబర్‌ నేరాలు, డీప్‌ఫేక్‌ల వంటి ముప్పులను ఎదుర్కొనేందుకు ప్రభుత్వాలు, టెలికం సంస్థలు, ఆర్థిక సేవల సంస్థలు సమన్వయంతో పనిచేయాలని మోదీ పిలుపునిచ్చారు. ప్రజలు మోసాల బారిన పడకుండా ముందస్తు నివారణ వ్యవస్థను రూపొందించాలని సూచించారు. సైబర్‌ నేరాలకు దేశ సరిహద్దులు అడ్డుకావని, సాంకేతికతపై ప్రజలకు నమ్మకం కల్పించాలంటే భద్రతను బలోపేతం చేయాల్సిన అవసరం ఉందన్నారు. సైబర్‌ నేరాల నియంత్రణలో భారత్‌ సాధించిన అనుభవాన్ని ఇతర దేశాలతో పంచుకోవడానికి సిద్ధంగా ఉందని తెలిపారు. మొబైల్‌ ఫోన్లు సమాచార మార్పిడికే కాకుండా పాలన, ప్రజలకు సేవల అందజేతలోనూ కీలకంగా మారాయని పేర్కొన్నారు. టెలికం రంగంలో సంస్కరణలు వేగవంతమవుతున్నాయని, ప్రపంచ మొబైల్‌ రంగ భవిష్యత్తును తీర్చిదిద్దడంలో ఇండియా మొబైల్‌ కాంగ్రెస్‌ కీలక పాత్ర పోషిస్తుందని ప్రధాని అన్నారు.