భాద్రపద మాసం ప్రారంభం.. ముఖ్య పర్వదినాలు ఇవే!

తెలుగు పంచాంగం ప్రకారం ఆరో మాసమైన భాద్రపద మాసానికి ఆధ్యాత్మికంగా ఎంతో విశిష్టత ఉంది. దక్షిణాయన పుణ్యకాలంలో వచ్చే ఈ మాసం భక్తి, ఆత్మశోధన, ఆధ్యాత్మిక పునరుద్ధరణకు పవిత్రమైన కాలంగా భావిస్తారు. భాద్రపద పౌర్ణమి రోజున చంద్రుడు పూర్వాభాద్ర లేదా ఉత్తరాభాద్ర నక్షత్రాల్లో సంచరించడం వల్ల ఈ మాసానికి భాద్రపదం అనే పేరు వచ్చిందని పంచాంగాలు పేర్కొంటాయి. వినాయక చవితి, ఋషిపంచమి, అనంత పద్మనాభ వ్రతం, మహాలయ పక్షాలు, మాసశివరాత్రి వంటి పర్వదినాలు ఈ మాసానికి ప్రత్యేక ఆకర్షణగా నిలుస్తాయి.

సెప్టెంబర్ 12 నుంచి అక్టోబర్ 10 వరకు భాద్రపద మాసం కొనసాగుతుంది. సెప్టెంబర్ 14న వినాయక చవితి, సెప్టెంబర్ 15న ఋషి పంచమి, సెప్టెంబర్ 22న పరివర్తన ఏకాదశి, వామన జయంతి, సెప్టెంబర్ 25న అనంత పద్మనాభ వ్రతం, గణపతి నిమజ్జనం, సెప్టెంబర్ 27న మహాలయ పక్షాల ప్రారంభం, అక్టోబర్ 2న గాంధీ జయంతి, అక్టోబర్ 6న ఏకాదశి, అక్టోబర్ 8న మాసశివరాత్రి, అక్టోబర్ 10న మహాలయ అమావాస్య వంటి ముఖ్య పర్వదినాలు ఉన్నాయి. అక్టోబర్ 10తో భాద్రపద మాసం ముగుస్తుంది. శాస్త్రాల్లో పేర్కొన్న ఆచారాలను పాటించేటప్పుడు ఆయా ప్రాంతాల పంచాంగాలు, నిపుణుల సూచనలను పరిగణనలోకి తీసుకోవడం మంచిది.