అర్ష్‌దీప్ సింగ్ మనసు దోచిన బ్యూటీ ఈమెనే..

భారత యువ పేసర్ అర్ష్‌దీప్ సింగ్ తన ప్రేమ వ్యవహారంపై కొంతకాలంగా వస్తున్న ఊహాగానాలకు దాదాపుగా తెరదించారు. నటి, మోడల్ సమ్రీన్ కౌర్‌తో కలిసి దిగిన రెండు ఫొటోలను ఇన్‌స్టాగ్రామ్‌లో షేర్ చేసిన అర్ష్‌దీప్.. ‘నా మనిషి’ అంటూ క్యాప్షన్ జోడించారు. దీంతో వీరిద్దరూ డేటింగ్‌లో ఉన్నారంటూ గత కొంతకాలంగా వస్తున్న వార్తలకు మరింత బలం చేకూరింది. అర్ష్‌దీప్ పోస్ట్‌కు అభిమానుల నుంచి భారీ స్పందన లభించగా, పలువురు శుభాకాంక్షలు తెలియజేస్తున్నారు.

సమ్రీన్ కౌర్ నటిగా, మోడల్‌గా, సోషల్ మీడియా ఇన్‌ఫ్లుయెన్సర్‌గా గుర్తింపు తెచ్చుకున్నారు. 1999 సెప్టెంబర్ 7న జన్మించిన ఆమె జమ్మూకశ్మీర్‌కు చెందినవారు. పుణెలో బీకామ్ (ఆనర్స్) పూర్తి చేసిన సమ్రీన్.. ఫెమినా మిస్ ఇండియా 2018 ఫైనలిస్ట్‌గా అందరి దృష్టిని ఆకర్షించారు. మోడలింగ్‌తో కెరీర్ ప్రారంభించి ఆ తర్వాత నటన వైపు అడుగులు వేసిన ఆమె ‘83’, ‘సర్దార్ జీ 2’ వంటి చిత్రాలతో పాటు పలు వెబ్ సిరీస్‌లలోనూ కనిపించారు. మరోవైపు అర్ష్‌దీప్ సింగ్ భారత టీ20 జట్టులో కీలక పేసర్‌గా గుర్తింపు పొందారు.