వాహనాల సామర్థ్య పరీక్షలకు ఆధునిక సాంకేతికత - మంత్రి పొన్నం ప్రభాకర్

తెలంగాణలో వాహనాల సామర్థ్య పరీక్షలను ఆధునిక సాంకేతిక పరిజ్ఞానంతో నిర్వహించేందుకు రాష్ట్ర ప్రభుత్వం కీలక నిర్ణయం తీసుకుంది. రాష్ట్రవ్యాప్తంగా 37 స్వయంచాలిత వాహన పరీక్షా కేంద్రాల ఏర్పాటుకు రూ.425.50 కోట్లతో సవరించిన పరిపాలనా అనుమతులు మంజూరు చేసింది. ఈ మేరకు రవాణా, రహదారులు, భవనాల శాఖ అక్టోబర్ 15న జారీ చేసిన ప్రభుత్వ ఉత్తర్వుల సంఖ్య 50లో వివరాలు వెల్లడించింది. గతంలో ఒక్కో కేంద్రం ఏర్పాటుకు రూ.8 కోట్లుగా నిర్ణయించిన వ్యయాన్ని తాజాగా రూ.11.50 కోట్లకు పెంచింది.

ఈ ప్రాజెక్టును రెండు దశల్లో అమలు చేయనున్నారు. మొదటి దశలో 15 పరీక్షా కేంద్రాల ఏర్పాటుకు రూ.172.50 కోట్లు, రెండో దశలో మిగిలిన 22 కేంద్రాల ఏర్పాటుకు రూ.253 కోట్లు కేటాయించారు. కేంద్రాల ఏర్పాటు, నిర్వహణ కోసం రవాణా శాఖ పరిధిలో ప్రత్యేక ప్రయోజన సంస్థను ఏర్పాటు చేయనున్నారు. గృహ నిర్మాణ, పట్టణాభివృద్ధి సంస్థ (హడ్కో) వంటి ఆర్థిక సంస్థల నుంచి రుణాలు సమీకరించనున్నారు. వాహనాల సామర్థ్య పరీక్షల ద్వారా వచ్చే దరఖాస్తు రుసుములు, పరీక్షా రుసుములు, వినియోగదారు ఛార్జీలను రుణాల అసలు, వడ్డీ చెల్లింపులకు వినియోగించనున్నారు. ప్రత్యేక సంస్థ నిర్మాణం, విధివిధానాలు, ఆర్థిక నమూనాకు సంబంధించిన ప్రతిపాదనలు సమర్పించాలని రవాణా కమిషనర్‌ను ప్రభుత్వం ఆదేశించింది.