న్యూస్
అతి చిన్న వయసులోనే బిలియనీర్గా ఎదిగిన అలెగ్జాండర్ వాంగ్, మెటా వంటి దిగ్గజ సంస్థలో కీలక ఏఐ బాధ్యతలు నిర్వహించే స్థాయికి చేరుకున్నారు. ప్రస్తుతం 28 ఏళ్ల వయసులోనే మెటాలో చీఫ్ ఏఐ ఆఫీసర్గా పనిచేస్తున్న ఆయన, ఇటీవల పిల్లలు మరియు యువతను ఉద్దేశించి ఆసక్తికర వ్యాఖ్యలు చేశారు. ఏఐ టూల్స్ సహాయంతో ‘వైబ్ కోడింగ్’ చేస్తున్న 13 ఏళ్ల బాలుడే రేపటి బిల్ గేట్స్ అవుతాడని ఆయన అభిప్రాయపడ్డారు. మీరు 13 ఏళ్ల వయసులో ఉంటే, మీ సమయాన్ని పూర్తిగా వైబ్ కోడింగ్కు కేటాయించి, అదే మీ జీవిత భాగంగా మార్చుకోవాలని సూచించారు. రాబోయే రోజుల్లో ఉద్యోగ మార్కెట్లో ముందుండాలని కోరుకునే వారికి ఇది ఎంతో ఉపయోగకరమని ఆయన అన్నారు.
వైబ్ కోడింగ్ అనేది ఒక కొత్త తరహా సాంకేతిక ట్రెండ్. ఇది సహజ భాష ఆధారంగా, ఏఐ సహాయంతో పనిచేసే విధానం. సంప్రదాయ కోడింగ్లో ప్రోగ్రామింగ్ భాషలపై లోతైన పరిజ్ఞానం అవసరం అవుతుంది. అయితే వైబ్ కోడింగ్లో సాధారణ ఇంగ్లిష్లో చిన్న ప్రాంప్ట్ రాయగలిగితే చాలు. ఏఐ టూల్స్ ఆ సూచనలను ఫంక్షనల్ కోడ్గా మార్చేస్తాయి. దీని ద్వారా వినియోగదారులు రిప్లిట్, కర్సర్ వంటి ప్లాట్ఫామ్లపై స్వయంగా యాప్లను రూపొందించుకోవచ్చు. సులభంగా చెప్పాలంటే, యూజర్ తనకు ఏం కావాలో చెబితే, ఏఐ టూల్స్ అది తయారు చేసి ఇస్తాయి. దీనికి లోతైన సాంకేతిక నైపుణ్యం అవసరం లేదు. టెక్నాలజీ ప్రపంచంలో ఈ రోజు అగ్రస్థానంలో ఉన్న బిల్ గేట్స్, మార్క్ జుకర్బర్గ్ వంటి వారు కూడా చిన్న వయసులోనే కొత్త టెక్నాలజీలతో ప్రయోగాలు చేస్తూ ఎదిగినవారేనని వాంగ్ గుర్తుచేశారు. తొలి తరం కంప్యూటర్లను చిన్న వయసులోనే ఉపయోగించడంతో వారు భారీ ప్రయోజనం పొందారని, అదే వారిని బిలియనీర్లుగా మార్చిందని ఆయన తెలిపారు. ప్రస్తుతం ఏఐ యుగంలోనూ ఇదే పరిస్థితి పునరావృతం అవుతుందని వాంగ్ అభిప్రాయపడ్డారు. ఏఐ టూల్స్తో ప్రయోగాలు చేసే వారికి భవిష్యత్తులో పెద్ద ఆధిక్యం లభిస్తుందని, అలాంటి వారే రేపటి బిల్ గేట్స్లుగా ఎదుగుతారని ఆయన చెప్పారు. అందుకే గేమింగ్, క్రీడలు వంటి హాబీల కంటే వైబ్ కోడింగ్పై యువత దృష్టి పెట్టాలని సూచించారు. భవిష్యత్తులో ఉత్పత్తులు, సేవల రూపురేఖలను ఏఐ పూర్తిగా మార్చివేయబోతోందని ఆయన అంచనా వేశారు.
అలెగ్జాండర్ వాంగ్ కేవలం 19 ఏళ్ల వయసులోనే ‘స్కేల్ ఏఐ’ అనే స్టార్టప్ను స్థాపించారు. 24 ఏళ్లకే బిలియనీర్గా మారి రికార్డు సృష్టించారు. 28 ఏళ్ల వయసులో ప్రముఖ కృత్రిమ మేధ సంస్థ మెటా ఏఐలో అత్యున్నత బాధ్యతలు చేపట్టారు. ప్రస్తుతం మెటాలో చీఫ్ ఏఐ ఆఫీసర్గా వ్యవహరిస్తూ, సూపర్ ఇంటెలిజెన్స్ ల్యాబ్స్ను నడిపిస్తున్నారు. మెటాలో అత్యధిక వేతనం పొందుతున్న అధికారిగా కూడా ఆయన నిలిచారు. ‘వైబ్ కోడింగ్’పై గూగుల్ సీఈవో సుందర్ పిచాయ్ కూడా స్పందించారు. ఇంజినీరింగ్ నేపథ్యం లేని వారు కూడా తమ అవసరాలకు అనుగుణంగా వైబ్ కోడింగ్ సహాయంతో యాప్లను రూపొందిస్తున్నారని ఆయన తెలిపారు. దీంతో సాఫ్ట్వేర్ అభివృద్ధి మరింత సులభంగా మారిందన్నారు. ఇంటర్నెట్ కొత్తగా పరిచయమైన సమయంలో రచయితలు బ్లాగింగ్ను కెరీర్గా మలచుకున్నట్లే, ఇప్పుడు వైబ్ కోడింగ్ కూడా ఉద్యోగ రంగంలో కొత్త అవకాశాలను సృష్టిస్తోందని పిచాయ్ చెప్పారు. ఇలాంటి సాంకేతికతలు భవిష్యత్తులో మరింత అభివృద్ధి చెందుతాయని, వాటిని ప్రజలు ఎలా ఉపయోగించబోతున్నారో చూడాలని తాను ఆసక్తిగా ఎదురుచూస్తున్నానని ఆయన వ్యాఖ్యానించారు.
కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!