యూరప్‌ మార్కెట్ లో టెస్లాకు షాక్

యూరప్‌ లో టెస్లా పరిస్థితి మరింత క్షీణిస్తోంది. యూరోపియన్ ఆటోమొబైల్ మాన్యుఫ్యాక్చరర్స్ అసోసియేషన్ (ACEA) వెల్లడించిన గణాంకాల్లో, అక్టోబర్ నెలలో టెస్లా కొత్త రిజిస్ట్రేషన్లు 6,964 యూనిట్లకు పడిపోయాయి. ఇది గత సంవత్సరం ఇదే నెలతో పోలిస్తే 48.5 శాతం తగ్గుదల. మరోవైపు యూరప్, యుకే మరియు EFTA దేశాల్లో మొత్తం ఎలక్ట్రిక్ వాహన రిజిస్ట్రేషన్లు 32.9 శాతం పెరిగాయి. అన్ని రకాల వాహనాల రిజిస్ట్రేషన్లు కూడా 4.9 శాతం పెరిగాయి.

ఈ తగ్గుదల వరుసగా పదవ నెల. రిఫ్రెష్ చేసిన మోడల్ Y మార్కెట్ లోకి వచ్చినా, పెరిగిన పోటీ, CEO ఎలాన్ మస్క్‌ పై పెరుగుతున్న ప్రతికూల అభిప్రాయం టెస్లా అమ్మకాల్ని ప్రభావితం చేస్తున్నాయి. కాగా యూరప్‌ లో మొత్తం EV మార్కెట్ వాటా 16.4 శాతానికి పెరిగింది.

ఈ అక్టోబర్ తగ్గుదల తో 2025 మొత్తం సంవత్సరం టెస్లా కు యూరప్‌ లో కఠినంగా మారింది. జనవరి నుంచి అక్టోబర్ వరకు టెస్లా రిజిస్ట్రేషన్లు 29.6 శాతం పడిపోయి 1.6 శాతం మార్కెట్ షేర్‌ కు తగ్గాయి. ఇది గత ఏడాది 2.4 శాతంతో పోల్చితే గణనీయమైన తగ్గుదల.

ఇదే సమయంలో చైనా ఆటోమేకర్లు వేగంగా ఎదుగుతున్నారు. BYD యూరప్‌లో తన అమ్మకాలను 207 శాతం పెంచుకుని 17,470 యూనిట్లు విక్రయించింది. SAIC కూడా దాదాపు 24,000 వాహనాలు అమ్ముతూ 46 శాతం వృద్ధిని సాధించింది.

యూరప్ వంటి EV ఆధారిత మార్కెట్‌ లో అమ్మకాలు తగ్గడం టెస్లాకు ఆందోళనకరమైన విషయం అయినప్పటికీ, స్టాక్‌ పై దాని ప్రభావం పెద్దగా కనిపించలేదు. సోమవారం టెస్లా షేర్లు దాదాపు 7 శాతం పెరిగాయి. స్వయంచాలక వాహన సాంకేతికత మరియు చిప్ అభివృద్ధిలో టెస్లా వేగంగా ముందుకు సాగుతోందని Melius Research కంపెనీ దానిని “must-own” స్టాక్‌ గా అభివర్ణించింది. స్వయంచాలక డ్రైవింగ్ టెక్నాలజీ రాబోయే కాలంలో మొత్తం వాహన వ్యవస్థను మార్చేయగలదని విశ్లేషకుడు రాబ్ వెర్తీమర్ అభిప్రాయపడ్డారు.