ఓవర్‌డ్రాఫ్ట్‌ లేదా వ్యక్తిగత రుణం ఏది మంచిది?

ఆర్థిక అవసరాలను తీర్చుకోవడానికి ప్రస్తుతం చాలా మంది రుణాలను ఆశ్రయిస్తున్నారు. అందులో ముఖ్యంగా ఓవర్‌డ్రాఫ్ట్‌ సదుపాయం, వ్యక్తిగత రుణం ఎక్కువగా వినియోగంలో ఉన్నాయి. వేతన ఖాతాదారులు, వ్యాపార సంస్థలు, బ్యాంకులతో మంచి లావాదేవీలు ఉన్న వారికి బ్యాంకులు ఓవర్‌డ్రాఫ్ట్‌ సదుపాయం కల్పిస్తాయి. ఈ విధానంలో ఖాతాలో డబ్బు లేకపోయినా ముందుగా ఆమోదించిన పరిమితి వరకు నగదును తీసుకోవచ్చు. వినియోగించిన మొత్తంపైనే వడ్డీ చెల్లించాల్సి ఉండటంతో అత్యవసర అవసరాలకు ఇది అనుకూలంగా ఉంటుంది.

వ్యక్తిగత రుణం అనేది ఎలాంటి తాకట్టు అవసరం లేని రుణం. రుణం మంజూరు చేసే ముందు రుణగ్రహీత ఆదాయం, చెల్లింపు చరిత్ర, పరపతి స్థాయిని పరిశీలిస్తారు. రుణం మంజూరైన తర్వాత మొత్తం సొమ్ము ఖాతాలో జమ అవుతుంది. మొదటి రోజు నుంచే మొత్తం రుణంపైనే వడ్డీ లెక్కించబడుతుంది. నిర్ణీత కాలపరిమితిలో నెలవారీ వాయిదాల రూపంలో రుణాన్ని తిరిగి చెల్లించాల్సి ఉంటుంది. ముందుగానే ఖర్చు ప్రణాళిక ఉన్నవారికి ఈ రుణం అనుకూలంగా ఉంటుంది.

నిపుణుల అభిప్రాయం ప్రకారం ఓవర్‌డ్రాఫ్ట్‌లో సౌలభ్యం ఎక్కువగా ఉంటుంది. అవసరాన్ని బట్టి డబ్బు తీసుకుని, వీలైనప్పుడు తిరిగి చెల్లించవచ్చు. అయితే చెల్లింపులో ఆలస్యం చేస్తే వడ్డీ భారం పెరిగే అవకాశం ఉంది. ఓవర్‌డ్రాఫ్ట్‌పై వార్షిక వడ్డీ రేట్లు సాధారణంగా 18 శాతం నుంచి 24 శాతం వరకు ఉండవచ్చు. వ్యక్తిగత రుణాల్లో మంచి పరపతి చరిత్ర ఉన్న వారికి తక్కువ వడ్డీ రేట్లతో రుణం లభించే అవకాశం ఉంటుంది. ముఖ్యంగా 700 కంటే ఎక్కువ పరపతి స్కోరు ఉన్నవారు మెరుగైన రేట్లతో అధిక మొత్తంలో రుణం పొందవచ్చు. పెళ్లిళ్లు, వైద్య చికిత్సలు, ఉన్నత విద్య, ప్రయాణాలు, గృహ మరమ్మతుల వంటి అవసరాలకు వ్యక్తిగత రుణాలను ఎక్కువగా ఉపయోగిస్తారు.