గూగుల్ జెమినీతో నెక్ట్స్‌జెన్ సిరి: గోప్యతకే ప్రాధాన్యం ఇస్తున్న ఆపిల్

ఆపిల్ తన కొత్త తరం సిరి వాయిస్ అసిస్టెంట్‌ను గూగుల్ జెమినీ ఏఐ మోడళ్లతో పనిచేయించనున్నట్లు అధికారికంగా ప్రకటించింది. ఈ విషయాన్ని ఆపిల్ 2026 ఆర్థిక సంవత్సరం తొలి త్రైమాసిక ఫలితాల సమావేశంలో కంపెనీ ఉన్నతాధికారులు వెల్లడించారు. సిరి ఇప్పటిలాగే మొబైల్‌లోనే అలాగే ఆపిల్ ప్రైవేట్ క్లౌడ్ కంప్యూట్ ద్వారా పనిచేస్తుందని సీఈవో టీమ్ కుక్ తెలిపారు. గూగుల్‌తో భాగస్వామ్యం వినియోగదారులకు మరింత మెరుగైన అనుభవం ఇవ్వడానికే తప్ప, గోప్యత విషయంలో ఎలాంటి రాజీ ఉండదని ఆయన స్పష్టం చేశారు.

అలాగే, ఆపిల్ స్వయంగా అభివృద్ధి చేస్తున్న ఏఐ టెక్నాలజీ గూగుల్ జెమినీతో ఉన్న భాగస్వామ్యాన్ని ప్రభావితం చేయదని టీమ్ కుక్ తెలిపారు. ఆపిల్ ఇంటెలిజెన్స్‌ను ప్రస్తుతం ఎంతమంది ఉపయోగిస్తున్నారు లేదా అది ఐఫోన్ అమ్మకాలపై ప్రభావం చూపుతోందా అనే విషయాలపై కంపెనీ వ్యాఖ్యానించలేదు. పలు ఏఐ ఎంపికలను పరిశీలించిన తర్వాతే జెమినీని ఎంచుకున్నట్లు ఆపిల్ పేర్కొంది. జెమినీ ఆధారంగా రూపొందిన మరింత వ్యక్తిగతీకరించిన సిరి వెర్షన్ ఈ ఏడాది చివర్లో ఐఫోన్, ఐప్యాడ్, మ్యాక్ పరికరాల్లో అందుబాటులోకి రానుంది.