సీఎస్‌కే కోచ్‌ ఎంపికలో ధోని కండీషన్లు...

చెన్నై సూపర్‌ కింగ్స్‌కు (CSK) సుదీర్ఘకాలం ప్రధాన కోచ్‌గా సేవలందించిన స్టీఫెన్‌ ఫ్లెమింగ్‌ వైదొలిగి దాదాపు రెండు నెలలు అవుతోంది. అయినప్పటికీ అతడి స్థానంలో కొత్త హెడ్‌ కోచ్‌ను సీఎస్‌కే ఇంకా అధికారికంగా ప్రకటించలేదు. పలువురి పేర్లు ప్రచారంలోకి వస్తున్నా.. ఫ్రాంచైజీ నుంచి స్పష్టత రాలేదు. వచ్చే వారంలోనే కొత్త కోచ్‌పై నిర్ణయం తీసుకునే అవకాశం ఉందని ఐపీఎల్‌ వర్గాలు చెబుతున్నాయి. ఈ నేపథ్యంలో ఎంఎస్‌ ధోని మేనేజ్‌మెంట్‌ ముందు రెండు షరతులు పెట్టినట్లు సమాచారం. కొత్త హెడ్‌ కోచ్‌ భారతీయుడే అయి ఉండాలని, సపోర్ట్‌ స్టాఫ్‌ కూడా ఎక్కువగా భారత్‌కు చెందిన వారే ఉండాలని ధోని కోరినట్లు తెలుస్తోంది. దీంతో సీఎస్‌కే మాజీ ఆటగాడు, ఆస్ట్రేలియా మాజీ క్రికెటర్‌ మైక్‌ హస్సీకి హెడ్‌ కోచ్‌ అవకాశం దక్కుతుందన్న అంచనాలకు బ్రేక్‌ పడినట్లయింది. హస్సీ గత కొన్నేళ్లుగా సీఎస్‌కే బ్యాటింగ్‌ కోచ్‌గా కొనసాగుతున్నాడు.

ధోని పెట్టినట్లు చెబుతున్న రెండో షరతు కూడా కీలకంగా మారింది. కొత్త హెడ్‌ కోచ్‌ సీఎస్‌కేతో మాత్రమే పనిచేయాలని, ఫ్రాంచైజీకి చెందిన ఇతర లీగ్‌ జట్లతో కోచింగ్‌ బాధ్యతలు చేపట్టకూడదని ఆయన కోరినట్లు సమాచారం. గతంలో ఫ్లెమింగ్‌ జోహెన్నెస్‌బర్గ్‌ సూపర్‌ కింగ్స్‌, టెక్సాస్‌ సూపర్‌ కింగ్స్‌ జట్లకూ కోచింగ్‌ బాధ్యతలు నిర్వర్తించాడు. ఈ నేపథ్యంలో దిల్లీ క్యాపిటల్స్‌ హెడ్‌ కోచ్‌ హేమంగ్‌ బదానీ పేరు తెరపైకి వచ్చింది. భారత్‌కు చెందిన బదానీకి కోచింగ్‌లో మంచి అనుభవం ఉంది. ప్రస్తుతం అతడు క్యాపిటల్స్‌ వ్యవస్థలో కీలక బాధ్యతలు నిర్వహిస్తున్నాడు. ధోనితోనూ అతడికి మంచి సంబంధాలు ఉన్నట్లు క్రికెట్‌ వర్గాల్లో చర్చ జరుగుతోంది. మరి సీఎస్‌కే మేనేజ్‌మెంట్‌ ఎవరిని కొత్త హెడ్‌ కోచ్‌గా ఎంపిక చేస్తుందో చూడాలి.