భారత పారా అథ్లెట్ల ఘనతపై గవర్నర్ శివ ప్రతాప్ శుక్ల హర్షం

ఆసియా పారా గేమ్స్‌–2026లో భారత్‌ రికార్డు స్థాయిలో 114 పతకాలు సాధించడంపై గవర్నర్‌ శివ ప్రతాప్ శుక్ల హర్షం వ్యక్తం చేశారు. ఈ ఘనత సాధించిన భారత పారా అథ్లెట్లను ఆయన అభినందించారు. క్రీడాకారుల పట్టుదల, అంకితభావం, కఠోర శ్రమ దేశానికి గర్వకారణమని పేర్కొన్నారు. సవాళ్లను అధిగమిస్తూ అంతర్జాతీయ వేదికపై పతకాలు సాధించడం వారి ఆత్మవిశ్వాసానికి, కృషికి నిదర్శనమని ప్రశంసించారు. పారా అథ్లెట్ల విజయాలు యువతకు స్ఫూర్తినిస్తాయని, లక్ష్యాన్ని చేరుకోవడానికి పట్టుదలతో ముందుకు సాగాలనే సందేశాన్ని అందిస్తాయని గవర్నర్‌ అన్నారు.

పతకాలు సాధించిన తెలంగాణ పారా అథ్లెట్లు దీప్తి జీవాంజి, బానోతు అకీరాలకు గవర్నర్‌ ప్రత్యేక అభినందనలు తెలిపారు. మహిళల 400 మీటర్ల టీ20 విభాగంలో దీప్తి జీవాంజి స్వర్ణ పతకం సాధించగా, పురుషుల 400 మీటర్ల టీ38 విభాగంలో బానోతు అకీరా రజత పతకాన్ని కైవసం చేసుకున్నారు. వీరి విజయాలు తెలంగాణకు గుర్తింపు తీసుకురావడంతో పాటు ఆసియా పారా గేమ్స్‌లో భారత్‌ సాధించిన విజయాలకు మరింత గౌరవాన్ని తెచ్చాయి. పారా అథ్లెట్ల అంకితభావం, నిరంతర కృషి యువతకు ఆదర్శమని గవర్నర్‌ పేర్కొంటూ, క్రీడాకారుల విజయాలు దేశానికి గర్వకారణమని ప్రశంసించారు.