సబితా ఇంద్రారెడ్డి, కార్తీక్‌ రెడ్డి హౌస్‌ అరెస్ట్‌పై కేటీఆర్‌ ఆగ్రహం

మూసీ ప్రాజెక్టుపై ప్రజాభిప్రాయ సేకరణకు వెళ్లకుండా మాజీ మంత్రి సబితా ఇంద్రారెడ్డి, రాజేంద్రనగర్‌ బీఆర్‌ఎస్‌ ఇన్‌ఛార్జ్‌ కార్తీక్‌ రెడ్డిని గృహ నిర్బంధం చేయడంపై బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ తీవ్రంగా స్పందించారు. ప్రజాస్వామ్యానికి విరుద్ధమైన ఈ చర్యను ఖండిస్తూ, కాంగ్రెస్‌ ప్రభుత్వ పాలన గతంలో ఎమర్జెన్సీ రోజులను గుర్తు చేస్తోందని విమర్శించారు. మూసీ పరివాహక ప్రాంత ప్రజల తరఫున పోరాడుతున్న బీఆర్‌ఎస్‌ గొంతు నొక్కేందుకు ప్రభుత్వం ప్రయత్నిస్తోందని ఆరోపించారు. ఇలాంటి చర్యలను సహించబోమని, ప్రజాక్షేత్రంలో ప్రభుత్వానికి తగిన సమాధానం చెబుతామని తన ఎక్స్‌ పోస్టులో పేర్కొన్నారు.

రాష్ట్రంలో కరువు పరిస్థితులు నెలకొని రైతులు ఇబ్బందులు పడుతుంటే, ముఖ్యమంత్రి రేవంత్‌ రెడ్డి మూసీ ప్రాజెక్టుకు ప్రాధాన్యం ఇస్తున్నారని కేటీఆర్‌ ఆరోపించారు. ఎండిపోయిన పంటలకు ఎకరాకు కనీసం రూ.50 వేల పరిహారం అందించాలని డిమాండ్‌ చేశారు. మూసీ ప్రాజెక్టు పేరుతో లక్షన్నర కోట్ల రూపాయల అవినీతికి ప్రభుత్వం ప్రణాళిక రచిస్తోందని, ప్రజల ఇళ్లను కూల్చి రియల్‌ ఎస్టేట్‌ ప్రయోజనాల కోసం ప్రయత్నిస్తోందని విమర్శించారు. ఈ ఆరోపణల నేపథ్యంలో మూసీ ప్రాజెక్టుపై పోరాటాన్ని కొనసాగిస్తామని స్పష్టం చేశారు. సబితా ఇంద్రారెడ్డి, కార్తీక్‌ రెడ్డిని బేషరతుగా విడుదల చేయాలని, మూసీ ప్రాజెక్టు పేరుతో జరుగుతున్నట్లు తాము ఆరోపిస్తున్న దోపిడీని నిలిపివేసి, కరువుతో ఇబ్బందులు పడుతున్న రైతు కుటుంబాలను ఆదుకోవాలని ప్రభుత్వాన్ని డిమాండ్‌ చేశారు.