'మండాడి’ నిర్మాతకు కాసుల పంట.. ఊహించని జాక్‌పాట్!

సూరి, సుహాస్‌ ప్రధాన పాత్రల్లో తెరకెక్కిన ‘మండాడి’ బాక్సాఫీస్‌ వద్ద మంచి జోరును కొనసాగిస్తున్నట్లు సమాచారం. సుమారు రూ.45 కోట్ల బడ్జెట్‌తో తెరకెక్కిన ఈ సినిమాకు డిజిటల్‌ హక్కుల విషయంలో ఆసక్తికరమైన పరిణామం చోటుచేసుకుంది. నెట్‌ఫ్లిక్స్‌ తొలుత సుమారు రూ.15 కోట్లకు ఔట్‌రైట్‌ డీల్‌కు సిద్ధమైనట్లు తెలుస్తోంది. అయితే నిర్మాత ఎల్రెడ్‌ కుమార్‌ మరింత ఎక్కువ మొత్తాన్ని ఆశించగా, థియేట్రికల్‌ వసూళ్ల ఆధారంగా డిజిటల్‌ రేటు మారేలా నెట్‌ఫ్లిక్స్‌ పర్ఫార్మెన్స్‌ బేస్డ్‌ డీల్‌ను ప్రతిపాదించినట్లు సమాచారం.

సినిమా కంటెంట్‌, సూరి నటన, సుహాస్‌ విలన్‌ షేడ్స్‌, టెక్నికల్‌ వాల్యూస్‌పై నమ్మకంతో నిర్మాత ఈ రిస్క్‌ను స్వీకరించినట్లు తెలుస్తోంది. విడుదలైన తర్వాత ‘మండాడి’కి మంచి మౌత్‌ టాక్‌ రావడంతో థియేటర్లలో వసూళ్లు భారీగా పెరిగాయి. దీంతో ఒప్పందంలోని బెంచ్‌మార్క్‌లు అందుకోవడంతో నెట్‌ఫ్లిక్స్‌ నుంచి సుమారు రూ.40 కోట్ల వరకు అందుకునే అవకాశం ఏర్పడిందని సమాచారం. ఇప్పటికే డిజిటల్‌ హక్కులు, థియేట్రికల్‌ షేర్‌తో పెట్టుబడి రికవరీ అయినట్లు కథనం పేర్కొంటోంది. ఇకపై వచ్చే థియేట్రికల్‌, శాటిలైట్‌ ఆదాయం నిర్మాతకు అదనపు లాభంగా మారే అవకాశం ఉంది.