సంక్రాంతి క్యాంపెయిన్‌కు శ్రీకారం చుట్టిన రాకింగ్ స్టార్ మంచు మనోజ్!

తెలుగు ప్రేక్షకుల కోసం ప్రత్యేకంగా రూపొందించిన సంక్రాంతి బ్రాండ్ ఫిల్మ్‌ను మంచు మనోజ్తో కలిసి జీ5 విడుదల చేసింది. ‘మన పండగ, మన ఎంటర్‌టైన్‌మెంట్, మన తెలుగు జీ5’ అనే కమ్యూనికేషన్ లైన్‌తో రూపొందిన ఈ క్యాంపెయిన్‌లో సంక్రాంతి పండుగకు చెందిన ఆత్మీయత, కుటుంబ బంధాలు, సున్నితమైన హాస్యాన్ని సహజంగా ఆవిష్కరించారు. సంప్రదాయ గ్రామీణ మండువ ఇంటి సెట్‌లో తెరకెక్కిన ఈ బ్రాండ్ ఫిల్మ్‌లో, పండుగకు అల్లుడిగా ఊరికి వస్తున్న మనోజ్ ప్రయాణం, బస్సులో చోటుచేసుకునే సరదా సంఘటనలు, చివరికి కుటుంబంతో కలిసి పండుగను సెలబ్రేట్ చేసే క్షణాలు ప్రేక్షకులను ఆకట్టుకుంటాయి. తెలుగు ప్రేక్షకులకు నిజమైన వినోదాన్ని అందించాలనే జీ5 హామీని ఈ క్యాంపెయిన్ మరింత బలంగా ప్రతిబింబిస్తోంది.

ఇంటికి చేరుకున్న తర్వాత కుటుంబ సభ్యులతో కలిసి పాటలు, సరదా సంభాషణలు, సినిమాల సన్నివేశాలతో పండుగ వాతావరణాన్ని చూపిస్తూ జీ5లో రాబోయే కంటెంట్‌పై హింట్ ఇస్తారు. ‘మన శంకర వర ప్రసాద్ గారు’, ‘భర్త మహాశయులకు విజ్ఞప్తి’ వంటి చిత్రాల ప్రస్తావనతో కుటుంబం అంతా కలిసి ఎంజాయ్ చేసే వినోదాన్ని ప్రతిబింబించారు. ఈ బ్రాండ్ ఫిల్మ్‌కు సాయి మార్తాండ్ దర్శకత్వం వహించగా, సూర్య బాలాజీ సినిమాటోగ్రఫీ అందించారు. తెలుగు సంస్కృతికి దగ్గరగా ఉండే కథలు, పండుగ థీమ్‌తో కూడిన కంటెంట్ ద్వారా ఈ ఏడాదంతా తిరుగులేని ఎంటర్‌టైన్‌మెంట్‌ను అందించాలనే లక్ష్యాన్ని జీ5 మరోసారి చాటింది.