జన నాయకన్ పై ప్రశ్నించగా.. రజనీకాంత్ సమాధానం ఇదే

నటుడు, టీవీకే అధినేత విజయ్ నటించిన జన నాయకన్ సినిమా విడుదల వాయిదా పడిన విషయం తెలిసిందే. అయితే కొత్త విడుదల తేదీ పై ఇంకా ఎలాంటి స్పష్టత లేదు. ఈ ఆలస్యంపై మీ అభిప్రాయం ఏమిటని ప్రశ్నించగా రజనీకాంత్ స్పందించకుండా క్షమించండి.. దీనిపై నేను మాట్లాడలేను అని మాత్రమే చెప్పారు. ఇటీవల జైలర్ 2 షూటింగ్‌లో భాగంగా ఒక దశ పూర్తిచేసుకున్న రజనీకాంత్ బుధవారం చెన్నైకి చేరుకున్నారు. ఈ సందర్భంగా విమానాశ్రయంలో మీడియాతో మాట్లాడారు.

తాను మరియు కమల్ హాసన్ కలిసి నటించే కొత్త సినిమా చిత్రీకరణ ఆగస్టులో ప్రారంభం కానుందని వెల్లడించారు. జైలర్ 2 చిత్రీకరణ కూడా త్వరలో పూర్తవుతుందని, విడుదల తేదీని త్వరలో ప్రకటిస్తారని తెలిపారు. ఇది గతంలో విజయం సాధించిన జైలర్ చిత్రానికి కొనసాగింపుగా రూపొందుతోంది. ఈ సినిమాకు నెల్సన్ దిలీప్ కుమార్ దర్శకత్వం వహిస్తున్నారు.

ఇక యువతకు రజనీకాంత్ పలు ముఖ్యమైన సూచనలు చేశారు. చదువుకునే సమయంలో చదువుపైనే పూర్తి దృష్టి పెట్టాలని అన్నారు. ఆ సమయంలో నిర్లక్ష్యం చేస్తే భవిష్యత్తులో ఇబ్బందులు ఎదురవుతాయని చెప్పారు. ఆరోగ్యాన్ని కాపాడుకోవడానికి వ్యాయామం తప్పనిసరిగా చేయాలని సూచించారు. మత్తు పదార్థాలకు దూరంగా ఉండాలని, అలాంటి అలవాట్లు జీవితాన్ని నాశనం చేస్తాయని హెచ్చరించారు