అల్లువారి ఇంట్లో పెళ్లి పనులు షురూ...

అల్లు కుటుంబంలో పెళ్లి సంబరాలు మొదలయ్యాయి. మెగా నిర్మాత అల్లు అరవింద్ చిన్న కుమారుడు అల్లు శిరీష్ త్వరలో వివాహ బంధంలోకి అడుగుపెట్టబోతున్నారు. తన చిరకాల ప్రేయసితో కలిసి కొత్త జీవితాన్ని ప్రారంభించేందుకు సిద్ధమయ్యారు. ఇటీవల దుబాయ్‌లో ప్రీ-వెడ్డింగ్ వేడుక జరుపుకున్న ఈ జంట, ఇప్పుడు హైదరాబాద్‌లోని తమ నివాసంలో సంప్రదాయబద్ధంగా ‘పసుపు దంచుడు’ కార్యక్రమాన్ని నిర్వహించారు.

ఈ కార్యక్రమానికి మెగా కుటుంబ సభ్యులు మరియు బంధువులు హాజరయ్యారు. సుస్మిత, రామ్ చరణ్ సతీమణి ఉపాసన, పవన్ కల్యాణ్ సతీమణి అన్నా లెజినోవా, అల్లు అర్జున్ సతీమణి స్నేహ తదితరులు ఈ వేడుకలో పాల్గొన్నారు. సాధారణంగా హల్దీ వేడుకను గ్రాండ్‌గా నిర్వహిస్తారు. అయితే అల్లు కుటుంబం ఈ కార్యక్రమాన్ని సింపుల్‌గా, ఇంట్లోనే సంప్రదాయ పద్ధతిలో జరుపుకుంది. ఈ వేడుకకు సంబంధించిన వీడియోలు ప్రస్తుతం సోషల్ మీడియాలో వైరల్ అవుతున్నాయి.

అల్లు శిరీష్ వివాహ తేదీ విషయంలో ఒక ఆసక్తికరమైన విషయం దాగి ఉంది.. మార్చి 6, 2026 న ఈ జంట వివాహం జరగనుంది. ఇక్కడ విశేషమేమిటంటే, అదే రోజు అల్లు అర్జున్ – స్నేహారెడ్డిల పెళ్లి రోజు కూడా. అన్నయ్య మ్యారేజ్ డే రోజే తమ్ముడు కూడా పెళ్లి చేసుకోవడం అల్లు కుటుంబంలో ఒక మధుర జ్ఞాపకంగా మిగిలిపోనుంది. గత సంవత్సరం అక్టోబర్ 31 న వీరి నిశ్చితార్థం ఘనంగా జరిగిన విషయం తెలిసిందే.