మొదటి సినిమా ముందు నిద్రపట్టలేదు - విస్మయ మోహన్‌లాల్

మలయాళ సూపర్ స్టార్ మోహన్‌లాల్ కుమార్తె విస్మయ మోహన్‌లాల్ ‘తుడక్కం’ చిత్రంతో నటిగా వెండితెరకు పరిచయం అవుతున్నారు. ఆగస్టు 7న విడుదల కానున్న ఈ సినిమా సందర్భంగా ఆమె తన జీవిత ప్రయాణంలోని ఎన్నో ఆసక్తికర విషయాలను పంచుకున్నారు. చిన్నప్పుడు తన తండ్రి ప్రముఖ నటుడని తన స్కూల్ స్నేహితులకు తెలియదని, రంగస్థలంపై నటించాలంటే మొదట చాలా భయపడేదాన్నని తెలిపారు. చిన్నప్పటి నుంచే డ్రాయింగ్, పెయింటింగ్, కవిత్వం వంటి సృజనాత్మక రంగాలపై ఆసక్తి పెంచుకున్న ఆమె, అమెరికా, యూకేలో థియేటర్ ఆర్ట్స్ అభ్యసించి నటనపై మరింత పట్టు సాధించినట్లు చెప్పారు.

‘తుడక్కం’లో తండ్రీ-కుమార్తెల అనుబంధాన్ని చూపించే కథ తనను బాగా ఆకట్టుకుందని విస్మయ వెల్లడించారు. షూటింగ్‌కు ముందు తీవ్ర టెన్షన్‌కు గురైనప్పటికీ దర్శకుడు జూడ్ ఆంటోనీ జోసెఫ్ తనలో ఆత్మవిశ్వాసాన్ని నింపారని చెప్పారు. అన్న ప్రణవ్ మోహన్‌లాల్ ‘ఎక్కువగా ఆలోచించకుండా నటనను ఆస్వాదించు’ అని సలహా ఇవ్వగా, తండ్రి మోహన్‌లాల్ ‘నీ జీవితాన్ని నువ్వే మలచుకోవాలి’ అంటూ ప్రోత్సహించారని తెలిపారు. ఒకప్పుడు 100 కిలోల బరువున్న తాను థాయ్‌లాండ్‌లో ముయ్ థాయ్ శిక్షణ తీసుకుని 22 కిలోలు తగ్గి ఫిట్‌నెస్ సాధించానని చెప్పారు. భవిష్యత్తులో విభిన్నమైన, అర్థవంతమైన పాత్రలను పోషించడమే తన లక్ష్యమని విస్మయ పేర్కొన్నారు.