దర్శకుడిగా రామ్ పోతినేని తొలి సినిమా.. ‘రాపో23’లోకి బాలీవుడ్ స్టార్

టాలీవుడ్ హీరో రామ్ పోతినేని తొలిసారి దర్శకుడిగా మెగాఫోన్ పట్టిన చిత్రం ‘రాపో23’ (వర్కింగ్ టైటిల్). ఈ సినిమాతో ప్రేక్షకులకు సరికొత్త సినీ అనుభూతిని అందించేందుకు ఆయన సిద్ధమవుతున్నారు. రాపో సినిమాటిక్స్ బ్యానర్‌పై కృష్ణ పోతినేని ఈ చిత్రాన్ని దాదాపు రూ.100 కోట్ల భారీ బడ్జెట్‌తో నిర్మిస్తున్నారు. నటుడిగా తనదైన గుర్తింపు తెచ్చుకున్న రామ్.. ఇప్పుడు దర్శకత్వ బాధ్యతలు చేపడుతుండటంతో ఈ ప్రాజెక్టుపై ప్రేక్షకుల్లో ఆసక్తి నెలకొంది.

తాజాగా ఈ చిత్రంలో బాలీవుడ్ నటుడు రితేశ్ దేశ్‌ముఖ్ భాగమైనట్లు చిత్రబృందం ప్రకటించింది. ఆయనకు స్వాగతం పలుకుతూ ప్రత్యేక వీడియోను విడుదల చేసింది. ఈ సినిమాలో రితేశ్ ప్రతినాయకుడి పాత్రలో కనిపించనున్నట్లు సమాచారం. అయితే దీనిపై చిత్రబృందం నుంచి అధికారిక స్పష్టత రావాల్సి ఉంది. మరోవైపు, రామ్ ఈ చిత్రంలో ‘వీర’ అనే స్టైలిష్ పాత్రలో కనిపించనుండగా, సంయుక్త కథానాయికగా నటిస్తున్నారు. రామ్, రితేశ్ దేశ్‌ముఖ్ కలయికలో రూపొందుతున్న ఈ సినిమా ఎలా ఉండబోతుందోనని సినీ అభిమానులు ఆసక్తిగా ఎదురుచూస్తున్నారు.