రివ్యూవర్స్‌కు మధుర శ్రీధర్ రెడ్డి ప్రత్యేక విజ్ఞప్తి – “ఆడియన్స్ దృష్టితో చూడండి సర్!”

విక్రాంత్ రెడ్డి హీరోగా, చాందిని చౌదరి హీరోయిన్‌గా, సంజీవ్ రెడ్డి దర్శకత్వంలో రూపొందిన చిత్రం సంతాన ప్రాప్తిరస్తు. ఇటీవల విడుదలైన ట్రైలర్‌తో ఈ సినిమా మంచి హైప్‌ క్రియేట్‌ చేసింది. ముఖ్యంగా పంచ్ లైన్స్‌ మరియు సోషల్ మీడియాలో వైరల్ అయిన మీమ్స్‌ను సినిమాలో చమత్కారంగా మిళితం చేశారు. ఈ చిత్రం నవంబర్ 14న ప్రేక్షకుల ముందుకు రానుంది.

ఈ సందర్భంగా యూనిట్ ఒక ప్రెస్‌మీట్‌ నిర్వహించింది. నిర్మాత మధుర శ్రీధర్ రెడ్డి మాట్లాడుతూ — “సినిమా చూసిన వారు మంచి రెస్పాన్స్ ఇచ్చారు. అయితే రివ్యూవర్స్‌కు నేను ఒక స్పెషల్ రిక్వెస్ట్ చేయాలనుకుంటున్నాను” అని అన్నారు.

ఆయన వివరాల్లోకి వెళ్తూ — “సాధారణంగా నా సినిమాలను విడుదలకు ముందే మీడియా మరియు ఇండస్ట్రీ ఫ్రెండ్స్‌కి చూపిస్తాను. కొంతమంది నవ్వలేదు, ఎందుకంటే వారికి ఇది కామన్‌గా అనిపించింది. కానీ థియేటర్‌లో నార్మల్ ఆడియన్స్ మాత్రం చిన్న సన్నివేశాలకే విపరీతంగా నవ్వుతున్నారు. అందువల్ల రివ్యూవర్స్ కూడా ఈ సినిమాను ఆడియన్స్ పర్స్పెక్టివ్‌లో చూసి రాయాలని కోరుకుంటున్నాను” అని అన్నారు.

“మేము ఆడియన్స్ టెస్ట్‌లో పాస్ అయ్యాం, కానీ రివ్యూవర్స్ టెస్ట్‌లో కూడా పాస్ అవ్వాలి. ఇది చిన్న సినిమా, కాన్సెప్ట్ ఉన్న సినిమా. కాబట్టి దయచేసి పాజిటివ్‌గా చూడండి” అని ఆయన విజ్ఞప్తి చేశారు.

దర్శకుడు సంజీవ్ రెడ్డి మాట్లాడుతూ — “ఇది ఒక కాన్సెప్ట్‌ ఓరియెంటెడ్ సినిమా. మీరు నచ్చిందని అనుకుంటే ఒక లైన్ ఎక్కువ రాయండి. నచ్చని విషయం ఉంటే ఒక లైన్ తక్కువ రాయండి” అంటూ హాస్యంగా చెప్పారు.

నవంబర్ 14న ఈ సినిమా విడుదల కానుంది. అదే రోజున రామ్ గోపాల్ వర్మ దర్శకత్వం వహించిన శివ రీ రిలీజ్ కూడా వస్తోంది. అదనంగా రానా నిర్మించిన దుల్కర్ సల్మాన్ నటించిన కాంత కూడా అదే రోజు థియేటర్లలోకి రానుంది. ఈ పోటీ మధ్య సంతాన ప్రాప్తిరస్తు ఎంతవరకు విజయాన్ని అందుకుంటుందో చూడాలి.