సాదా హారర్‌ కాదు.. కొత్త అనుభూతిని ఇవ్వాలనుకున్నాం – దర్శకుడు మారుతి!

పాన్‌ ఇండియా స్టార్‌ ప్రభాస్‌తో సాదాసీదా హారర్‌ కామెడీ చేయకుండా, ఫాంటసీ మరియు సైకలాజికల్‌ అంశాలను మేళవించి భారీ స్థాయి చిత్రం రూపొందించామని దర్శకుడు మారుతి తెలిపారు. ప్రేక్షకులు ఈ కొత్త ప్రయత్నాన్ని ఆదరించడంతోనే సినిమా రూ.200 కోట్ల వసూళ్ల మైలురాయిని దాటిందన్నారు. సంక్రాంతి సెలవులకు ముందే మంచి వసూళ్లు సాధించిన ఈ చిత్రం, పండగ రోజుల్లో మరింత ఆదరణ పొందుతుందని ఆశాభావం వ్యక్తం చేశారు. ప్రభాస్‌ కొత్త గెటప్‌, కలర్‌ఫుల్‌ పాటలు, డ్యాన్సులు అభిమానులను విశేషంగా ఆకట్టుకున్నాయని చెప్పారు.

ఫాంటసీతో కూడిన సైకలాజికల్‌ నేపథ్యాన్ని విజువల్‌గా చూపించడం సవాలేనని, హిప్నాటిజం కాన్సెప్ట్‌తో పాటు రివర్స్‌ సన్నివేశాల కోసం ఎంతో కష్టపడ్డామని మారుతి తెలిపారు. కొత్త జానర్‌లో ప్రభాస్‌ను ప్రేక్షకులు స్వీకరించిన విధానం సంతోషాన్నిచ్చిందన్నారు. సోషల్‌ మీడియాలో విమర్శలు ఉన్నా, థియేటర్లలో ప్రేక్షకుల స్పందన బలంగా ఉందని పేర్కొన్నారు. ఈ సినిమా తనకు గొప్ప అనుభవమని, భవిష్యత్తులో చిరంజీవితో సినిమా చేసే అవకాశం వస్తే అది ఎంతో ప్రత్యేకమని చెప్పారు.