‘గరివిడి లక్ష్మి’ మంచి ఫలితాలు సాధిస్తుంది - నిర్మాత టీజీ విశ్వప్రసాద్

ఉత్తరాంధ్ర జానపద గాయని గరివిడి లక్ష్మి జీవిత కథ ఆధారంగా ‘గరివిడి లక్ష్మి’ అనే బయోపిక్‌ రూపొందింది. ఈ చిత్రంలో ఆనంది టైటిల్‌ పాత్ర పోషించగా, గౌరి నాయుడు జమ్ము దర్శకత్వం వహించారు. ఇటీవల విడుదలైన థియేట్రికల్‌ ట్రైలర్‌కు ప్రేక్షకుల నుంచి మంచి స్పందన లభించింది. విడుదలకు ముందు నిర్వహించిన మీడియా సమావేశంలో, ఇతర చిత్రాలతో పోటీ నేపథ్యంలో తమ సినిమాకు థియేటర్లు కేటాయించిన తీరుపై సంతృప్తిగా ఉన్నారా అని నిర్మాత టీజీ విశ్వప్రసాద్‌ను ప్రశ్నించారు.

దీనిపై ఆయన స్పందిస్తూ, థియేటర్ల కేటాయింపులో వ్యాపారపరమైన అంశాలు కీలకమని, పెద్ద సినిమాలకు సహజంగానే ఎక్కువ ప్రారంభ వసూళ్లు లభిస్తాయని అన్నారు. ‘గరివిడి లక్ష్మి’ని చిన్న సినిమాగా చూడకూడదని, ఇది మంచి చిత్రమని పేర్కొన్నారు. అక్టోబర్‌ 17న విడుదల కానున్న ఈ సినిమా క్రమంగా పుంజుకుని, థియేటర్లలో సుదీర్ఘ ప్రదర్శన కొనసాగిస్తుందని ఆశాభావం వ్యక్తం చేశారు. పోటీలో ఉన్న మూడు సినిమాలూ మంచి ఫలితాలు సాధిస్తాయని, ‘గరివిడి లక్ష్మి’ నెమ్మదిగా పుంజుకుంటుందని విశ్వప్రసాద్‌ అన్నారు. గరివిడి లక్ష్మి జీవితంలోని ఎత్తుపల్లాలు, ఆమె అద్భుతమైన ప్రయాణాన్ని ఈ చిత్రం ఆవిష్కరించనుంది.