ఛాంపియన్‌లో బలమైన యాక్షన్, హృదయాన్ని తాకే భావోద్వేగాలు - హీరో రోషన్!

స్వప్న సినిమాస్ బ్యానర్‌పై రూపొందుతున్న అప్‌కమింగ్ మూవీ ఛాంపియన్ ఆసక్తికరమైన ప్రమోషనల్ కంటెంట్‌తో ఇప్పటికే మంచి బజ్‌ను సృష్టించింది. ఈ చిత్రంలో రోషన్, అనస్వర రాజన్ లీడ్ రోల్స్‌లో నటిస్తుండగా, ప్రదీప్ అద్వైతం దర్శకత్వం వహించారు. జీ స్టూడియోస్ సమర్పణలో ఆనంది ఆర్ట్ క్రియేషన్స్, కాన్సెప్ట్ ఫిల్మ్స్‌తో కలిసి ఈ చిత్రాన్ని నిర్మించారు. మిక్కీ జే మేయర్ అందించిన పాటలు ఇప్పటికే చార్ట్‌బస్టర్లుగా నిలిచాయి. ఈ చిత్రం డిసెంబర్ 25 న ప్రపంచవ్యాప్తంగా విడుదల కానుంది.

1948 కాలం నేపథ్యంలో తెరకెక్కిన ఈ సినిమా యాక్షన్, డ్రామా, వార్ ఎలిమెంట్స్‌తో గ్రాండ్‌గా రూపొందిందని రోషన్ తెలిపారు. బైరాన్‌పల్లి గ్రామానికి సంబంధించిన చారిత్రక నేపథ్యాన్ని ఆధారంగా తీసుకుని, మైఖేల్ అనే ఫిక్షనల్ క్యారెక్టర్ ద్వారా కథను ప్రజెంట్ చేసినట్లు చెప్పారు. ఈ సినిమా కోసం దర్శకుడు, నిర్మాతలు విస్తృతంగా రీసెర్చ్ చేయడంతో పాటు పలు వర్క్‌షాప్‌లు నిర్వహించారని, ప్రతి క్యారెక్టర్‌కు స్పష్టమైన ఆరంభం, ముగింపు ఉండేలా కథను డిజైన్ చేశారని ఆయన వివరించారు.

ట్రైలర్ లాంచ్ సందర్భంగా రామ్ చరణ్ తనపై చేసిన ప్రశంసలు ఎంతో ఆనందాన్ని ఇచ్చాయని రోషన్ చెప్పారు. నటుడిగా మెచ్యూరిటీ కోసం తీసుకున్న మూడేళ్ల గ్యాప్ పూర్తిగా తన నిర్ణయమేనని, ఆ సమయంలో ప్రయాణాలు చేస్తూ చాలా విషయాలు నేర్చుకున్నానని తెలిపారు. ఈ పాత్ర కోసం హైదరాబాదీ యాసను నేర్చుకోవడంతో పాటు కఠినమైన యాక్షన్ సన్నివేశాలకు శిక్షణ తీసుకున్నట్లు వెల్లడించారు. ఛాంపియన్ తనలో ఓ కొత్త రోషన్‌ను బయటకు తీసుకువచ్చిందని, సినిమా చూసిన తర్వాత ప్రేక్షకులు ఆ మార్పును స్పష్టంగా గమనిస్తారని ఆయన విశ్వాసం వ్యక్తం చేశారు.