రణవీర్ సింగ్‌పై 3 ఏళ్ల నిషేధం?

బాలీవుడ్ లో సంచలనం రేపుతూ ఫెడరేషన్ ఆఫ్ వెస్ట్రన్ ఇండియా సినీ ఎంప్లాయీస్ (ఎఫ్‌డబ్ల్యూఐసీఈ) రణవీర్ సింగ్ పై నాన్-కోఆపరేషన్ డైరెక్టివ్ విధించినట్లు వార్తలు వెలువడ్డాయి. మోస్ట్ అవేటెడ్ చిత్రం Don 3 షూటింగ్ ప్రారంభానికి కేవలం మూడు వారాల ముందే రణవీర్ సింగ్ ప్రాజెక్ట్ నుంచి తప్పుకోవడం ఈ వివాదానికి కారణమని తెలుస్తోంది. ఈ చిత్రం ఫర్హాన్ అక్తర్ దర్శకత్వంలో తెరకెక్కుతోంది.

FWICE చీఫ్ అడ్వైజర్ అశోక్ పండిట్ ప్రకారం, రణవీర్ ఆకస్మిక నిర్ణయం వల్ల దాదాపు ₹45 కోట్ల నష్టం వాటిల్లిందని సమాచారం. షూటింగ్ కోసం ముందుగానే భారీ స్థాయిలో ఏర్పాట్లు పూర్తి చేయడంతో టెక్నీషియన్లు, కెమెరామెన్లు, రోజువారీ సినీ కార్మికులు తీవ్రంగా నష్టపోయారని సంఘం ఆరోపించింది. వివరణ ఇవ్వాలంటూ పంపిన మూడు నోటీసులకు రణవీర్ స్పందించలేదని, అందుకే కఠిన నిర్ణయం తీసుకున్నామని FWICE వెల్లడించింది. అయితే ఈ వ్యవహారంపై రణవీర్ సింగ్ ఇప్పటివరకు అధికారికంగా స్పందించలేదు.