మాదాపూర్‌లో వ్యభిచార ముఠా గుట్టురట్టు

హైదరాబాద్‌లోని మాదాపూర్‌లో విదేశీ మహిళలతో వ్యభిచారం నిర్వహిస్తున్నట్లు అనుమానిస్తున్న ముఠా వ్యవహారాన్ని పోలీసులు వెలుగులోకి తెచ్చారు. ఈ ఘటనలో ఉజ్బెకిస్థాన్‌కు చెందిన ముగ్గురు మహిళలను అదుపులోకి తీసుకున్నారు. మాదాపూర్‌లోని ఓ సర్వీస్ అపార్ట్‌మెంట్‌లో నాయక్ అనే వ్యక్తి ఈ వ్యవహారాన్ని నిర్వహిస్తున్నట్లు పోలీసులకు సమాచారం అందింది. దీంతో స్పెషల్ ఆపరేషన్స్ టీమ్ (ఎస్‌వోటీ), మాదాపూర్ పోలీసులు సంయుక్తంగా అపార్ట్‌మెంట్‌పై దాడి చేసి ముగ్గురు మహిళలను అదుపులోకి తీసుకున్నారు. అయితే, ఈ వ్యవహారంలో ప్రధాన నిర్వాహకుడిగా అనుమానిస్తున్న నాయక్ అక్కడి నుంచి పరారైనట్లు పోలీసులు తెలిపారు.

ప్రాథమిక విచారణలో ముగ్గురు మహిళల వద్ద సరైన గుర్తింపు పత్రాలు లేవని పోలీసులు గుర్తించినట్లు సమాచారం. వారు తొలుత నేపాల్‌కు, అక్కడి నుంచి ఢిల్లీ మీదుగా హైదరాబాద్‌కు వచ్చినట్లు విచారణలో వెల్లడైంది. ఈ ఘటనపై మాదాపూర్ పోలీసులు కేసు నమోదు చేసి దర్యాప్తు చేపట్టారు. పరారీలో ఉన్న నాయక్‌ను గుర్తించి పట్టుకునేందుకు గాలింపు చర్యలు కొనసాగిస్తున్నారు. దర్యాప్తు పూర్తయిన తర్వాత ఈ వ్యవహారానికి సంబంధించిన మరిన్ని వివరాలు వెల్లడయ్యే అవకాశం ఉంది.