పచ్చదనం తగ్గితే ఫలితం ఇదే.. హీట్ రిస్క్‌లో హైదరాబాద్‌కు హెచ్చరిక

ప్రపంచవ్యాప్తంగా వేడి సంబంధిత ఆరోగ్య ముప్పు ఎక్కువగా ఉన్న 30 నగరాల్లో హైదరాబాద్ ఒకటిగా నిలిచిందని ఆక్స్ఫర్డ్ విశ్వవిద్యాలయం నిర్వహించిన అధ్యయనం వెల్లడించింది. 205 నగరాలపై చేపట్టిన ఈ పరిశోధనలో హైదరాబాద్ హీట్ వల్నరబిలిటీ ఇండెక్స్‌లో 0.68 స్కోరు నమోదు చేసింది. వేగవంతమైన పట్టణీకరణ, పచ్చదనం తగ్గిపోవడం, ఎయిర్ కండిషనర్ల వినియోగం పెరగడం వంటి అంశాలు వేడి సంక్షోభాన్ని మరింత తీవ్రతరం చేస్తున్నాయని అధ్యయనం పేర్కొంది.

ఈ ఏడాది ఏప్రిల్ 1 నుంచి జూన్ 5 వరకు హైదరాబాద్‌లో 47 రోజుల పాటు ఉష్ణోగ్రతలు 40 డిగ్రీల సెల్సియస్‌కు పైగా నమోదయ్యాయి. గత పదేళ్లలో ఇదే అత్యధిక సంఖ్యగా గుర్తించారు. భవిష్యత్తులో వేడి ప్రభావాన్ని తగ్గించేందుకు పచ్చదనం పెంపు, సమర్థవంతమైన పట్టణ ప్రణాళిక అవసరమని నిపుణులు సూచిస్తున్నారు.