తుపాను సన్నద్ధతపై కేంద్రం సమీక్ష..అధికారులకు కీలక ఆదేశాలు

బంగాళాఖాతంలో ఏర్పడుతున్న తుపాను ముప్పును ఎదుర్కొనేందుకు కేంద్ర, రాష్ట్ర ప్రభుత్వ శాఖలు చేపట్టిన సన్నద్ధతను సమీక్షించేందుకు జాతీయ సంక్షోభ నిర్వహణ కమిటీ (NCMC) ఉన్నతస్థాయి సమావేశం నిర్వహించింది. క్యాబినెట్ కార్యదర్శి డాక్టర్ టి.వి. సోమనాథన్ అధ్యక్షతన జరిగిన ఈ సమావేశంలో తుపాను ప్రభావాన్ని ఎదుర్కొనేందుకు ప్రభుత్వ విభాగాలు, అత్యవసర సహాయక బృందాలు, తీర ప్రాంత అధికారులు సిద్ధంగా ఉన్నారా అనే అంశాలపై సమీక్షించారు. వాతావరణ పరిస్థితులను నిరంతరం పర్యవేక్షిస్తూ, ఎలాంటి అత్యవసర పరిస్థితులు ఎదురైనా వేగంగా స్పందించేలా అవసరమైన ఏర్పాట్లు చేసుకోవాలని సంబంధిత అధికారులకు సూచించారు.

తుపాను కారణంగా విద్యుత్, టెలికమ్యూనికేషన్లు, తాగునీటి సరఫరా వంటి అత్యవసర సేవలకు అంతరాయం కలిగితే, వీలైనంత త్వరగా వాటిని పునరుద్ధరించాలని క్యాబినెట్ కార్యదర్శి అధికారులను ఆదేశించారు. విపత్తు నిర్వహణలో ముందస్తు చర్యలకు ప్రాధాన్యం ఇవ్వాలని, ప్రాణనష్టం జరగకుండా చూడటమే ప్రధాన లక్ష్యంగా పనిచేయాలని స్పష్టం చేశారు. అదే సమయంలో ఆస్తులు, ప్రభుత్వ మౌలిక సదుపాయాలకు జరిగే నష్టాన్ని తగ్గించేందుకు సమన్వయంతో చర్యలు చేపట్టాలని సూచించారు. తుపాను పరిస్థితులపై అధికారులు అప్రమత్తంగా ఉండగా, అత్యవసర సహాయక బృందాలు, తీర ప్రాంత యంత్రాంగం హై అలర్ట్‌లో కొనసాగుతున్నాయి.