ఏపీలో పాక్ గూఢచర్య కలకలం.. దేశ భద్రతపై దృష్టి

పాకిస్థాన్‌కు సంబంధించిన గూఢచర్య నెట్‌వర్క్‌ను ఆంధ్రప్రదేశ్ కౌంటర్ ఇంటెలిజెన్స్ సెల్ ఛేదించినట్లు సమాచారం. ‘ఆపరేషన్ ఫైర్‌వాల్-2026’ పేరుతో చేపట్టిన ప్రత్యేక ఆపరేషన్‌లో 10 రాష్ట్రాలు, కేంద్రపాలిత ప్రాంతాల్లో ఏకకాలంలో సోదాలు నిర్వహించారు. విశాఖపట్నం కేంద్రంగా సాగినట్లు అనుమానిస్తున్న ఈ గూఢచర్య వ్యవహారంలో 13 మంది నావికాదళ సిబ్బందితో పాటు మొత్తం 18 మందిపై నిఘా పెట్టినట్లు తెలుస్తోంది. ఈ కేసులో ఇద్దరిని అరెస్టు చేసినట్లు సమాచారం.

విచారణలో నేవీ సిబ్బందికి పాకిస్థాన్ ఇంటెలిజెన్స్ ఏజెంట్లతో ఉన్నట్లు అనుమానిస్తున్న రహస్య సంబంధాలు వెలుగులోకి వచ్చినట్లు అధికారులు తెలిపారు. ఎన్‌క్రిప్టెడ్ సాఫ్ట్‌వేర్‌ ద్వారా కదలికలు, సున్నితమైన సమాచారాన్ని శత్రు దేశానికి చేరవేస్తున్న నెట్‌వర్క్‌ను గుర్తించినట్లు సమాచారం. ఈ ఆపరేషన్ కోసం ఏపీ కౌంటర్ ఇంటెలిజెన్స్ సెల్ 12 ప్రత్యేక బృందాలను రంగంలోకి దించినట్లు తెలుస్తోంది. గూఢచర్య నెట్‌వర్క్‌ను ఛేదించడంలో ఈ ఆపరేషన్ కీలక ముందడుగుగా భావిస్తున్నారు.