ఓటీటీ సమీక్ష: ‘నందిని’..ఈ రొమాంటిక్ కథ ఎలా ఉందంటే?

OTT విడుదల తేదీ: 30 ఆగస్టు 2026

OTT వేదిక: ఈటీవీ విన్

నటీనటులు: ఆకాంక్ష, పవన్ సింగులూరి, మీనా వాసు, శరణ్య, నళినీ దేవి

దర్శకుడు: రామారావు సిరిపురం

నిర్మాత: వెంకట్ తలారి

సంగీత దర్శకుడు: సాయి కార్తీక్

సినిమాటోగ్రాఫర్: చందు క్రిష్

ఎడిటర్: బాలాజీ వి బి జే

కథ:
వైజాగ్‌కు చెందిన శివ, నందిని పెళ్లిచూపుల్లో ఒకరికొకరు పరిచయమవుతారు. అయితే ఈ పెళ్లి తనకు ఇష్టం లేదని, ఆ విషయాన్ని శివే పెద్దలకు చెప్పాలని నందిని కోరుతుంది. కానీ శివ మాత్రం తనకు ఈ పెళ్లి ఇష్టమేనని చెప్పడంతో నందిని షాక్ అవుతుంది. ఆ తర్వాత ఇద్దరూ కలిసి ప్రయాణం చేయాల్సి వస్తుంది. అసలు నందిని పెళ్లికి ఎందుకు నిరాకరిస్తుంది? ఆమె ఎదుర్కొంటున్న సమస్య ఏంటి? శివ దాన్ని ఎలా పరిష్కరిస్తాడు? చివరకు ఇద్దరి బంధం ఎలాంటి మలుపు తీసుకుంటుందనేదే ‘నందిని’ కథ.

ప్లస్ పాయింట్లు:
‘నందిని’లో పవన్ సింగులూరి, ఆకాంక్షల మధ్య కెమిస్ట్రీ ఆకట్టుకుంటుంది. ఒక వ్యక్తి తనకు ఇష్టమైన వారి కోసం ఎంతవరకు నిలబడగలడనే అంశాన్ని దర్శకుడు సింపుల్‌గా, డీసెంట్‌గా చూపించారు. కథ ప్రారంభంలో వచ్చే ఫన్ మూమెంట్స్, లీడ్ పెయిర్ కెమిస్ట్రీ, నటీనటుల సహజమైన పెర్ఫార్మెన్స్ సినిమాకు ప్రధాన బలంగా నిలిచాయి. కథలో వచ్చే కొన్ని ట్విస్టులు, క్లైమాక్స్‌లోని ఎమోషనల్ సన్నివేశాలు కూడా మెప్పిస్తాయి. ఇతర నటీనటులు కూడా తమ పాత్రలకు న్యాయం చేశారు.

మైనస్ పాయింట్లు:
హీరోయిన్ పాత్రకు సంబంధించిన బ్యాక్‌స్టోరీ మరింత బలంగా ఉంటే కథకు మంచి ఇంపాక్ట్ వచ్చేది. ఆమె ఎదుర్కొంటున్న వ్యక్తిగత సమస్యను ఎస్టాబ్లిష్ చేసిన విధానం, క్లైమాక్స్‌లో ఇచ్చిన ట్విస్ట్‌కు పూర్తిగా కనెక్ట్ అయినట్లు అనిపించదు. చిన్న వయసులో జరిగిన ఒక సంఘటన ప్రభావం నుంచి ఆమె పెళ్లి వయసుకు వచ్చినా బయటపడలేకపోవడం అనే పాయింట్ కొంత బలహీనంగా అనిపిస్తుంది. అలాగే కొన్ని పాటలు కథ ఫ్లోను డిస్టర్బ్ చేస్తాయి. ఎడిటింగ్‌ను మరింత షార్ప్‌గా చేసి ఉంటే సినిమా ఇంకాస్త క్రిస్ప్‌గా ఉండేది.

సాంకేతిక విభాగం:
‘నందిని’ నిర్మాణ విలువలు ఆకట్టుకునేలా ఉన్నాయి. షార్ట్ ఫిల్మ్ అయినప్పటికీ నిర్మాత వెంకట్ తలారి క్వాలిటీ విషయంలో రాజీ పడకుండా రిచ్‌గా తెరకెక్కించారు. సాయి కార్తీక్ సంగీతం బాగుంది. చందు క్రిష్ కెమెరా వర్క్ కూడా డీసెంట్‌గా ఉంది. అయితే ఎడిటింగ్ విషయంలో మరింత జాగ్రత్త తీసుకోవాల్సి ఉంది. దర్శకుడు రామారావు సిరిపురం ట్రీట్‌మెంట్ బాగున్నప్పటికీ, కథలోని ప్రధాన సమస్యకు ఇచ్చిన కారణాన్ని మరింత లాజికల్‌గా, బలంగా చూపించాల్సిన అవసరం ఉంది.

తీర్పు:
మొత్తంగా ‘నందిని’ ఈటీవీ విన్‌లో మంచి రోమ్ కామ్ లఘు చిత్రంగా నిలుస్తుంది. పవన్ సింగులూరి, ఆకాంక్షల కెమిస్ట్రీ, వారి పెర్ఫార్మెన్స్, లవ్ ట్రాక్, ఎమోషనల్ సన్నివేశాలు ఆకట్టుకుంటాయి. హీరోయిన్ బ్యాక్‌స్టోరీ విషయంలో మరింత బలమైన రచన అవసరమైనప్పటికీ, ఓవరాల్‌గా ‘నందిని’ ఓ డీసెంట్ వాచ్.

రేటింగ్: 2.5/5