'ఓం శాంతి శాంతి శాంతిః’ సినిమా సమీక్ష

విడుదల తేదీ: జనవరి 30, 2026

నటీనటులు: తరుణ్ భాస్కర్, ఈషా రెబ్బా, బ్రహ్మాజీ, బ్రహ్మానందం, సురభి ప్రభావతి, రోహిణి నోని తదితరులు

దర్శకుడు: ఏ.ఆర్. సజీవ్

నిర్మాతలు: సృజన్ యరబోలు, ఆదిత్య పిట్టీ

సంగీత దర్శకుడు: జే క్రిష్

సినిమాటోగ్రాఫర్: దీపక్ యెరగరా

ఎడిటర్: ఏ.ఆర్. సజీవ్

కథ:

ఓంకార్ నాయుడు (తరుణ్ భాస్కర్) కోపిష్టి స్వభావం కలిగిన అహంకారి వ్యక్తి. చేపల చెరువుల వ్యాపారం చేస్తుంటాడు. స్వేచ్ఛ లేని జీవితాన్ని గడిపిన ప్రశాంతి (ఈషా రెబ్బా) తన కలలను పక్కనపెట్టి ఓంకార్‌ను వివాహం చేసుకుంటుంది.

పెళ్లి అనంతరం వీరిద్దరి మధ్య జరిగే సంఘటనలు, భర్త అహంకారాన్ని భార్య ఎలా భరిస్తుంది, ఒక దశలో ఆమె సహనం ఎలా నశిస్తుంది, చివరకు తన భర్తకు ఎలా బుద్ధి చెబుతుంది అనే అంశాలే కథలోని ప్రధానాంశాలు.

ప్లస్ పాయింట్లు:

భార్యాభర్తల మధ్య జరిగే గొడవలను వినోదాత్మకంగా, సహజంగా చూపించిన విధానం సినిమాకు ప్రధాన బలం. ముఖ్యంగా భర్త అహంకారాన్ని ప్రశ్నించే భార్య పాత్రను దర్శకుడు బాగా ప్రెజెంట్ చేశారు. గర్భస్రావం ఎపిసోడ్‌, అక్కడి నుంచి కథ విడాకుల వైపు మలుపు తిరిగే తీరు భావోద్వేగంగా ఆకట్టుకుంటుంది. గోదావరి నేపథ్యం, అక్కడి యాస, భాష సినిమాకు సహజత్వాన్ని తీసుకొచ్చాయి. ఎమోషన్‌తో పాటు కామెడీ సన్నివేశాలను సమతుల్యంగా నడిపిన విధానం బాగుంది. తరుణ్ భాస్కర్ తన కామెడీ టైమింగ్‌తో పాటు సీరియస్ ఎమోషనల్ వేరియేషన్స్‌ను కూడా చక్కగా ప్రదర్శించారు. ఈషా రెబ్బా సహజమైన నటనతో ప్రేక్షకులను ఆకట్టుకుంది. బ్రహ్మాజీ తన పాత్రలో పూర్తిగా ఒదిగిపోయి బలమైన నటనను అందించారు. బ్రహ్మానందం సహా ఇతర సహాయ నటీనటులు కూడా తమ పాత్రలకు పూర్తి న్యాయం చేశారు.

మైనస్ పాయింట్లు:

కథలోని ప్రధాన పాత్రను బాగా డిజైన్ చేసినప్పటికీ, స్క్రీన్‌ప్లేను అదే స్థాయిలో ఆసక్తికరంగా రూపొందించలేకపోయారు. కొన్ని కీలక సన్నివేశాలు బలహీనంగా అనిపిస్తూ కథ ప్రవాహాన్ని దెబ్బతీశాయి. భార్యాభర్తల మధ్య ఉన్న ప్రధాన కాన్‌ఫ్లిక్ట్‌ను పూర్తిస్థాయిలో వినియోగించుకోలేదు. ముఖ్యంగా సెకండ్ హాఫ్‌లో కథనం నెమ్మదిగా సాగడంతో ఆసక్తి తగ్గుతుంది. కొన్ని సన్నివేశాలు రొటీన్‌గా అనిపించి సినిమాకు మైనస్‌గా మారాయి. కథనంలో మరింత పట్టు, పదునైన ఎమోషనల్ హై పాయింట్స్ ఉంటే సినిమా ప్రభావం ఇంకా బలంగా ఉండేది.

సాంకేతిక విభాగం:

దర్శకుడు ఏ.ఆర్. సజీవ్ టేకింగ్ బాగున్నప్పటికీ, స్క్రీన్‌ప్లే మరింత బలంగా ఉండాల్సింది.
జే క్రిష్ బ్యాక్‌గ్రౌండ్ స్కోర్ ఆకట్టుకుంటుంది, పాటలు పర్వాలేదు.
సినిమాటోగ్రఫీ చాలా అందంగా ఉంది.
ఎడిటింగ్‌లో కొంత సాగతీత తగ్గిస్తే ఇంకా బాగుండేది.
నిర్మాణ విలువల్లో నిర్మాతలు ఎక్కడా రాజీపడలేదు.

తీర్పు:

ఫ్యామిలీ ఎమోషనల్ కామెడీ ఎంటర్‌టైనర్‌గా తెరకెక్కిన ‘ఓం శాంతి శాంతి శాంతిః’ లో కథా భావం, నటన, భావోద్వేగాలు బలంగా ఉన్నాయి. అయితే రెగ్యులర్ సీన్స్ మరియు బలహీనమైన స్క్రీన్‌ప్లే సినిమాకు మైనస్ అయ్యాయి.
మొత్తానికి యూత్ మరియు ఫ్యామిలీ ఆడియన్స్‌కు నచ్చే ఓ సగటు ఎమోషనల్ ఎంటర్‌టైనర్.

రేటింగ్: 2.5 / 5