మంచి సినిమాకు రిస్క్ అవసరం

‘‘మంచి సినిమాలు రావాలంటే తప్పకుండా రిస్క్ తీసుకోవాలి. అదే సినిమాకు ప్రత్యేకతను తీసుకువస్తుంది’’ అంటూ డెకాయిట్ చిత్ర దర్శకుడు తెలిపారు. ప్రస్తుతం ప్రేమ కథలు, డ్రామాలు తెలుగులో తగ్గిపోతున్నాయని భావించి, ఆ లోటును పూడ్చాలనే ఉద్దేశంతో ఈ సినిమాను రూపొందించినట్లు చెప్పారు. మహిళలు, జెన్ జీ ప్రేక్షకులకు ఈ చిత్రం బాగా కనెక్ట్ అవుతుండటంతో మంచి స్పందన వస్తోందని తెలిపారు. తెలుగుతో పాటు హిందీలో కూడా ఒకేసారి తెరకెక్కించిన ఈ సినిమాకు అక్కడ కూడా మంచి ఆదరణ లభిస్తోందని వెల్లడించారు.

ఈ సందర్భంగా నిర్మాత సుప్రియ యార్లగడ్డ మాట్లాడుతూ, ‘‘డెకాయిట్ సినిమాకి క్లైమాక్సే అందం. ఇప్పుడు దాని గురించే ఎక్కువగా చర్చ జరుగుతోంది’’ అని పేర్కొన్నారు. అన్నపూర్ణ స్టూడియోస్ సమర్పణలో నిర్మితమైన ఈ చిత్రంలో అడివి శేష్, మృణాల్ ఠాకూర్ జంటగా నటించగా, షానియల్ డియో దర్శకత్వం వహించారు. ఇటీవల విడుదలైన ఈ సినిమా మంచి టాక్ తెచ్చుకోవడంతో హైదరాబాద్‌లో నిర్వహించిన మీడియా సమావేశంలో చిత్ర బృందం తమ ఆనందాన్ని వ్యక్తం చేసింది. కొత్తవాళ్లతో పని చేయడం సవాల్ అయినప్పటికీ, టీమ్ కృషితో అనుకున్న సమయానికి సినిమా పూర్తి చేశామని దర్శకుడు తెలిపారు.