గద్దర్ సినీ పురస్కారాలు సినీ రంగానికి ప్రోత్సాహం : ఆర్. నారాయణమూర్తి!

తెలంగాణ ప్రభుత్వం ప్రవేశపెట్టిన గద్దర్ సినీ పురస్కారాలు అభినందనీయమని ప్రముఖ సినీ నటుడు, దర్శకుడు ఆర్. నారాయణమూర్తి అన్నారు. ప్రజా గాయకుడు, విప్లవ కవి అయిన గద్దర్ పేరుతో అవార్డులు ఇవ్వడం కళాకారులకు గొప్ప గౌరవమని ఆయన పేర్కొన్నారు. గద్దర్ వంటి మహనీయుడి పేరుతో అవార్డులు ప్రకటించడం తెలంగాణ సంస్కృతి, కళలకు ఇచ్చే గౌరవానికి నిదర్శనమని ఆయన అభిప్రాయపడ్డారు.

దాదాపు 13 ఏళ్ల తర్వాత సినీ పరిశ్రమకు గుర్తింపు వచ్చేలా తెలంగాణ ప్రభుత్వం మంచి నిర్ణయం తీసుకుందని ఆర్. నారాయణమూర్తి తెలిపారు. ఈ అవార్డులు యువతరానికి ప్రోత్సాహం కలిగిస్తాయని అన్నారు. ఇదే సమయంలో ఆంధ్రప్రదేశ్ ప్రభుత్వం కూడా మళ్లీ నంది అవార్డులు ప్రకటించి సినీ రంగాన్ని ప్రోత్సహించాలని ఆయన కోరారు.