నటిగా పరిణతి తెచ్చిన వైద్య జీవితం: శ్రీలీల

తన నటన, ఎనర్జెటిక్ డ్యాన్స్‌తో దక్షిణాది ప్రేక్షకులను ఆకట్టుకుంటున్న యంగ్ సెన్సేషన్ శ్రీలీల ప్రస్తుతం వరుస భారీ ప్రాజెక్టులతో బిజీగా ఉంది. బాలీవుడ్ హీరో కార్తీక్ ఆర్యన్ సరసన దర్శకుడు అనురాగ్ బసు తెరకెక్కిస్తున్న రొమాంటిక్ మ్యూజికల్ లవ్‌స్టోరీతో హిందీ చిత్రసీమలో అడుగుపెడుతోంది. అలాగే తమిళంలో ధనుష్ హీరోగా, రాజ్‌కుమార్ పెరియసామి దర్శకత్వంలో తెరకెక్కుతున్న ‘ఓమ్’ చిత్రంలోనూ కీలక పాత్ర పోషిస్తోంది.

తాజా ఇంటర్వ్యూలో తన వైద్య విద్య, ఆసుపత్రి అనుభవాలు నటిగా తన ఆలోచనా విధానాన్ని మార్చాయని శ్రీలీల వెల్లడించింది. ఆసుపత్రిలో పనిచేసే సమయంలో పేషెంట్ల జీవితాలు, వారి కుటుంబాలు ఎదుర్కొనే ఆర్థిక, మానసిక పోరాటాలను దగ్గరగా చూశానని తెలిపింది. వైద్య రంగంలోని వాస్తవ ప్రపంచం, సినిమా రంగంలోని రంగుల ప్రపంచం అనే రెండు విభిన్న అనుభవాలు తనలో మరింత పరిణతిని తీసుకువచ్చి, పాత్రలను లోతుగా అర్థం చేసుకోవడంలో సహాయపడ్డాయని పేర్కొంది.