లోకేశ్ కనగరాజ్ కొత్త అడుగు… లేడీ ఓరియెంటెడ్ సినిమాతో నిర్మాతగా ఎంట్రీ

‘ఖైదీ, విక్రమ్, కూలీ, లియో’ వంటి విజయవంతమైన చిత్రాలతో కోలీవుడ్, టాలీవుడ్‌లో ప్రత్యేక గుర్తింపు తెచ్చుకున్న దర్శకుడు లోకేశ్ కనగరాజ్ ఇప్పుడు కొత్త ప్రయాణానికి సిద్ధమవుతున్నాడు. ప్రస్తుతం హీరోగా నటిస్తున్న ‘డిసి’ సినిమా జూలై 31న విడుదలకు సిద్ధమవుతుండగా, ఈ సినిమా ప్రమోషన్స్‌లో బిజీగా ఉన్న లోకేశ్ తన తదుపరి ప్రాజెక్టుపై కూడా దృష్టి పెట్టినట్లు సమాచారం. ఈసారి దర్శకుడిగా లేదా హీరోగా కాకుండా నిర్మాతగా కొత్త ప్రాజెక్టును ప్రారంభించనున్నట్లు కోలీవుడ్ వర్గాలు చెబుతున్నాయి.

ఈ నేపథ్యంలో లోకేశ్ కనగరాజ్ ఓ లేడీ ఓరియెంటెడ్ సినిమాను నిర్మించబోతున్నట్లు టాక్ వినిపిస్తోంది. ఈ చిత్రానికి విశాల్ వెంకట్ దర్శకత్వం వహించనున్నారని, హీరోయిన్ రెజీనా కసాండ్రా ప్రధాన పాత్రలో కనిపించనున్నట్లు సమాచారం. ఇప్పటికే ఈ చిత్రానికి సంబంధించిన కథ సిద్ధమైందని, మహిళా ప్రధాన కథ కావడంతో రెజీనా వెంటనే అంగీకరించినట్లు తెలుస్తోంది. షూటింగ్ కూడా ప్రారంభమైన ఈ ప్రాజెక్టుకు త్వరలో అధికారిక ప్రకటన వెలువడనున్నట్లు సినీ వర్గాల్లో చర్చ జరుగుతోంది.