నాగార్జున నమ్మకపోతే రామ్ గోపాల్ వర్మ కెరీర్ ముగిసిపోయేది: జేడీ చక్రవర్తి

టాలీవుడ్ నటుడు జేడీ చక్రవర్తి తన తాజా చిత్రం గాయపడ్డ సింహం ప్రమోషన్లలో భాగంగా ఒక ఆసక్తికర సంఘటనను పంచుకున్నారు. తన సినీ ప్రయాణానికి కీలక మలుపు తీసుకొచ్చిన శివ సినిమా షూటింగ్ మొదటి రోజు జరిగిన విషయాలను ఆయన గుర్తు చేసుకున్నారు. ఆ రోజు భారీ యాక్షన్ సన్నివేశం చిత్రీకరించేందుకు ఏర్పాట్లు జరిగాయని, ప్రముఖ ఫైట్ మాస్టర్ రాజు రూపొందించిన ప్లాన్‌లో టైర్లు కాల్చడం, పొగ ప్రభావాలు వంటి అంశాలు ఉన్నాయని చెప్పారు. అయితే అప్పుడే కొత్తగా దర్శకుడిగా పరిచయమవుతున్న రామ్ గోపాల్ వర్మ ఆ విధానాన్ని తిరస్కరించి, సహజత్వం ఉన్న సన్నివేశం కావాలని స్పష్టంగా తెలిపారని అన్నారు.

ఒక కొత్త దర్శకుడు అలా చెప్పడం అప్పట్లో పెద్ద చర్చకు దారితీసిందని జేడీ పేర్కొన్నారు. కానీ హీరో నాగార్జున మాత్రం వర్మ ప్రతిభను నమ్మి, ఆయనకు పూర్తి స్వేచ్ఛ ఇచ్చారని చెప్పారు. అదే నమ్మకం వర్మను ఈ స్థాయికి తీసుకువచ్చిందని ఆయన అభిప్రాయపడ్డారు. ఆ సమయంలో నాగార్జున ఆ నిర్ణయం తీసుకోకపోతే, వర్మ కెరీర్ అక్కడికే ఆగిపోయే అవకాశముండేదని జేడీ తెలిపారు. వర్మ ఎప్పుడూ తన ఆలోచనలపై నిలబడే వ్యక్తి అని, తన దృష్టికోణంతోనే సినిమాలను తీర్చిదిద్దే దర్శకుడని ఆయన ప్రశంసించారు.