వైరల్‌గా మారిన సూర్య - విజయ్ దేవరకొండ సరదా సంభాషణ!

సూర్య ప్రస్తుతం ‘కరుప్పు’ విజయాన్ని ఆస్వాదిస్తున్నారు. తెలుగులో ‘వీరభద్రుడు’ పేరుతో విడుదలైన ఈ చిత్రం ప్రేక్షకులను ఆకట్టుకుంటోంది. ఈ సందర్భంగా విజయ్ దేవరకొండ ఎక్స్ వేదికగా సూర్యకు ప్రత్యేక శుభాకాంక్షలు తెలిపారు. ప్రతి సంవత్సరం తెరపై అద్భుతాన్ని ఆవిష్కరించేందుకు సూర్య తన సర్వస్వాన్ని ధారబోస్తారని ప్రశంసించారు. థియేటర్లలో నెలకొన్న సందడి ఆయన కష్టానికి దక్కిన గొప్ప ఫలితమని పేర్కొన్నారు. అలాగే దర్శకుడు ఆర్జే బాలాజీ, నటి త్రిషలకు కూడా అభినందనలు తెలిపారు.

దీనికి స్పందించిన సూర్య తెలుగులో సరదాగా మాట్లాడుతూ మంచి హాలీడే స్పాట్ చెప్పాలని విజయ్‌ను అడిగారు. అందుకు విజయ్ దేవరకొండ, విదేశాలకు వెళ్లొద్దని ప్రధానమంత్రి సూచించిన నేపథ్యంలో ఇండియాలోని ప్రశాంతమైన హాలీడే ప్రదేశాలను వాట్సాప్‌లో పంపిస్తానని సరదాగా రిప్లై ఇచ్చారు. ప్రస్తుతం వీరి సంభాషణ సోషల్ మీడియాలో వైరల్‌గా మారింది. కోర్టుల్లో న్యాయం కోసం పోరాడుతున్న ప్రజలకు అండగా నిలిచే వీరభద్రుడు కథతో ఈ చిత్రాన్ని ఆర్జే బాలాజీ తెరకెక్కించారు.