అన్నపూర్ణ స్టూడియోలో అక్కినేని విగ్రహానికి నివాళులు అర్పించిన డిప్యూటీ సీఎం భట్టి విక్రమార్క

డిప్యూటీ సీఎం భట్టి విక్రమార్క, నటుడు అక్కినేని నాగార్జున ఆహ్వానం మేరకు అన్నపూర్ణ ఫిల్మ్ స్కూల్ మరియు స్టూడియోలను సందర్శించారు. ఈ సందర్భంగా సినీ రంగానికి అపారమైన సేవలు అందించిన మహానటుడు అక్కినేని నాగేశ్వరరావు (ANR) విగ్రహానికి పూలమాల వేసి నివాళులు అర్పించారు.

తెలుగు ప్రేక్షకుల హృదయాల్లో శాశ్వత స్థానం సంపాదించిన ANR గారి క్రమశిక్షణ, కృషి, విలువలు నేటి తరానికి గొప్ప ప్రేరణగా ఉంటాయని భట్టి విక్రమార్క పేర్కొన్నారు.

అన్నపూర్ణ స్టూడియోలో జరుగుతున్న శిక్షణా కార్యక్రమాలు, ఆధునిక సాంకేతిక వసతులు, మౌలిక సదుపాయాలను ఆయన పరిశీలించారు. అక్కడ జరుగుతున్న అభివృద్ధి కార్యక్రమాలు చూసి సంతోషం వ్యక్తం చేశారు.

తెలుగు సినిమా పరిశ్రమను ప్రపంచ స్థాయికి తీసుకెళ్లేందుకు ప్రభుత్వం ప్రత్యేక ప్రణాళికలు రూపొందిస్తున్నట్లు తెలిపారు. సినిమా, మీడియా, డిజిటల్, క్రియేటివ్ రంగాల్లో తెలంగాణ యువతకు మరింత అవకాశాలు కల్పించేందుకు ప్రభుత్వం పూర్తిగా కట్టుబడి ఉందని భట్టి విక్రమార్క స్పష్టం చేశారు.