కమల్‌ హాసన్‌కు భాగ్యశ్రీ ప్రామిస్‌....

శివకార్తికేయన్‌ హీరోగా తెరకెక్కుతున్న ‘సెయాన్‌’ చిత్రంపై ఇప్పటికే భారీ అంచనాలు నెలకొన్నాయి. కమల్‌ హాసన్‌ నిర్మాణ సంస్థలో రూపొందుతున్న ఈ సినిమాలో భాగ్యశ్రీ బోర్సే కథానాయికగా నటిస్తున్నారు. ఇటీవల కమల్‌ హాసన్‌ను కలిసిన భాగ్యశ్రీ ఆయనతో దిగిన చిత్రాలను సామాజిక మాధ్యమాల్లో పంచుకుంటూ భావోద్వేగ వ్యాఖ్యలు చేశారు. చిన్నప్పటి నుంచి కమల్‌ను చూస్తూ పెరిగానని, ఇప్పుడు ఆయన సినిమాల్లో నటించడం ఎంతో ప్రత్యేకంగా అనిపిస్తోందని పేర్కొన్నారు.

కమల్‌ హాసన్‌ తనను ఆశీర్వదించిన క్షణాలు జీవితాంతం గుర్తుండిపోతాయని భాగ్యశ్రీ తెలిపారు. ఆయన గర్వపడేలా నటిస్తానని హామీ ఇచ్చారు. ‘అమరన్‌’ విజయానంతరం శివకార్తికేయన్‌ కమల్‌ నిర్మాణ సంస్థలో చేస్తున్న రెండో చిత్రం ఇదే. దర్శకుడు శివకుమార్‌ మురుగేశన్‌ ఈ చిత్రాన్ని గ్రామీణ నేపథ్యంలో భావోద్వేగాలు, యాక్షన్‌, వినోదంతో తెరకెక్కిస్తున్నారు. ఈ సినిమా అక్టోబరులో ప్రేక్షకుల ముందుకు రానుంది.