ఎన్టీఆర్ డ్రాగన్ లో అనిల్ కపూర్, ఇంస్టాగ్రామ్ పోస్ట్ లో వెల్లడి!

దర్శకుడు ప్రశాంత్ నీల్ – యంగ్ టైగర్ జూనియర్ ఎన్టీఆర్ కాంబినేషన్‌లో తెరకెక్కుతున్న ప్రతిష్టాత్మక చిత్రం డ్రాగన్ పై అంచనాలు రోజు రోజుకు పెరుగుతున్నాయి. NTR 31గా ప్రచారంలో ఉన్న ఈ సినిమాకు సంబంధించి బాలీవుడ్ అగ్ర నటుడు అనిల్ కపూర్ కీలక పాత్రలో నటిస్తున్నట్లు వస్తున్న వార్తలను తాజాగా ఆయనే ధ్రువీకరించారు. డ్రాగన్ పోస్టర్‌ను ఇన్‌స్టాగ్రామ్ స్టోరీలో షేర్ చేస్తూ ‘ఒక సినిమా వచ్చేసింది, మరో రెండు లైనప్‌లో ఉన్నాయి’ అంటూ ఆయన పోస్ట్ చేయడం సినిమాపై ఆసక్తిని మరింత పెంచింది.

ఎన్టీఆర్‌తో కలిసి అనిల్ కపూర్ నటించడం ఇది రెండోసారి కాగా, గతంలో వీరిద్దరూ ‘వార్ 2’లో కలిసి నటించారు. అలాగే ‘అనిమల్’ తర్వాత మరోసారి దక్షిణాది దర్శకుడి చిత్రంలో అనిల్ కపూర్ కనిపించనున్నారు. ‘దేవర’ తర్వాత ఎన్టీఆర్, ‘సలార్’ తర్వాత ప్రశాంత్ నీల్ చేస్తున్న ఈ చిత్రం పీరియాడిక్ యాక్షన్ డ్రామాగా రూపొందుతోంది. ఇందులో ఎన్టీఆర్ సరసన రుక్మిణి వసంత్ హీరోయిన్‌గా నటిస్తుండగా, తారక్ ఇప్పటివరకు చేయని పవర్‌ఫుల్ మాస్ పాత్రలో, పూర్తిగా కొత్త లుక్‌తో కనిపించనున్నారని సమాచారం.