మహిళల్లో అల్జీమర్స్ ముప్పు పెరుగుదలపై డాక్టర్ల హెచ్చరిక

మహిళల్లో హార్మోన్ల మార్పులు అల్జీమర్స్ ముప్పును పెంచే ప్రధాన కారణాలలో ఒకటి. ముఖ్యంగా మెనోపాజ్ సమయంలో ఈస్ట్రోజెన్ హార్మోన్ స్థాయిలు తగ్గిపోతాయి. మెదడు కణాలను రక్షించడంలో ఈస్ట్రోజెన్ కీలక పాత్ర పోషిస్తుంది కాబట్టి, ఈ హార్మోన్ తగ్గడం వల్ల మెదడులో మార్పులు చోటుచేసుకుని మతిమరుపుకు దారితీసే ప్రమాదం ఉంటుంది. అంతేకాకుండా, కొన్ని ప్రత్యేకమైన జన్యువులు మహిళలపై ఎక్కువ ప్రభావం చూపుతాయి. ముఖ్యంగా APOE-ε4 అనే జన్యువు ఉన్న మహిళల్లో, అదే జన్యువు ఉన్న పురుషులతో పోలిస్తే అల్జీమర్స్ వచ్చే ప్రమాదం ఎక్కువగా ఉంటుందని పరిశోధనలు సూచిస్తున్నాయి. అలాగే మహిళలు సాధారణంగా పురుషుల కంటే ఎక్కువ కాలం జీవించడం కూడా ఈ వ్యాధి అవకాశాలను పెంచుతుంది, ఎందుకంటే అల్జీమర్స్ వయస్సుతో పాటు పెరిగే వ్యాధి. మెనోపాజ్ సమయంలో మెదడుకు అందే శక్తి తగ్గడం, గ్లూకోజ్ వినియోగంలో మార్పులు జరగడం వల్ల అమిలాయిడ్ ప్లాక్స్ వంటి వ్యర్థాలు మెదడులో పేరుకుపోయి జ్ఞాపకశక్తిని దెబ్బతీస్తాయి.

అల్జీమర్స్‌ను నివారించడానికి లేదా దాని తీవ్రతను తగ్గించడానికి నిపుణులు కొన్ని ముఖ్యమైన సూచనలు చేస్తున్నారు. ఆరోగ్యకరమైన ఆహారం తీసుకోవడం చాలా అవసరం. మెదడు పనితీరును మెరుగుపరిచే ఒమేగా-3 ఫ్యాటీ యాసిడ్స్ ఉన్న ఆహారాలు, ఆకుకూరలు ఆహారంలో చేర్చాలి. శారీరక వ్యాయామం మెదడుకు రక్త ప్రసరణను పెంచి దాని పనితీరును మెరుగుపరుస్తుంది. సుడోకు, పజిల్స్ వంటి మానసిక వ్యాయామాలు చేయడం, కొత్త విషయాలు నేర్చుకోవడం ద్వారా మెదడును చురుకుగా ఉంచుకోవాలి. మెనోపాజ్ సమయంలో వైద్యుల సలహా తీసుకుని తగిన జాగ్రత్తలు పాటించడం కూడా చాలా ముఖ్యం. అల్జీమర్స్ కేవలం వృద్ధాప్య సమస్య మాత్రమే కాకుండా, మహిళల విషయంలో హార్మోన్లు మరియు జన్యువుల కలయిక వల్ల వచ్చే వ్యాధి కావడంతో, మహిళలు 40 ఏళ్ల నుంచే తమ మెదడు ఆరోగ్యంపై ప్రత్యేక శ్రద్ధ పెట్టడం అవసరం.

గమనిక : ఈ సమాచారం కేవలం అవగాహన కోసం మాత్రమే. వైద్య సలహాగా పరిగణించకండి. ఆహారంలో మార్పులు చేయడానికి ముందు డాక్టర్లను సంప్రదించండి.