హరీష్ శంకర్ డైరెక్షన్ లో నాగ చైతన్య ?

నాగ చైతన్య ప్రస్తుతం కార్తీక్ దండు దర్శకత్వంలో తెరకెక్కుతున్న భారీ ప్రాజెక్ట్ ‘వృషకర్మ’లో నటిస్తున్నారు. సుమారు రూ.100 కోట్ల బడ్జెట్‌తో రూపొందుతున్న ఈ సినిమా సమ్మర్ లేదా పోస్ట్ సమ్మర్‌లో విడుదలయ్యే అవకాశాలు ఉన్నాయి. ఈ సినిమా షూటింగ్ పూర్తయ్యాక, మరో రెండు మూడు నెలల్లో నాగ చైతన్య ఈ ప్రాజెక్ట్ నుంచి ఫ్రీ అవుతారు. ఆ తర్వాత ఆయన చేయబోయే తదుపరి సినిమా ఏదన్నదానిపై ఇండస్ట్రీలో ఆసక్తి పెరిగింది.

ఇటీవల నాగ చైతన్య ఎక్కువగా లవ్ స్టోరీలు, డిఫరెంట్ కాన్సెప్ట్ సినిమాలు, మిస్టిక్ థ్రిల్లర్‌లపై ఫోకస్ చేశారు. చాలా కాలం తర్వాత ఈసారి ఓ పక్కా మాస్ ఎంటర్‌టైనర్ చేయాలని ఆయన డిసైడ్ అయినట్లు టాక్. ఈ మాస్ సినిమాకు మాస్ డైరెక్టర్ హరీష్ శంకర్ పేరు బలంగా వినిపిస్తోంది. ప్రస్తుతం హరీష్ శంకర్ ‘మిస్టర్ బచ్చన్’ తర్వాత ‘ఉస్తాద్ భ‌గ‌త్ సింగ్’ సినిమాతో బిజీగా ఉన్నారు. ఉస్తాద్ భ‌గ‌త్ సింగ్ మార్చి చివరి వారంలో విడుదలయ్యే అవకాశం ఉంది.

ఈ సినిమా రిలీజ్ తర్వాత నాగ చైతన్య – హరీష్ శంకర్ కాంబో సెట్ అయ్యే ఛాన్స్ ఉందని ఫిల్మ్‌నగర్‌లో చర్చ జరుగుతోంది. ఎన్టీఆర్ తో రామయ్య వస్తావయ్యా చేసిన తరువాత మళ్లీ ఓ రేంజ్ యంగ్ హీరోతో హరీష్ శంకర్ చేసే సినిమా ఇదే కావొచ్చు. అలాగే నాగ చైతన్య కూడా ఇటీవల కాలంలో ఒక పక్కా మాస్ డైరెక్టర్‌తో సినిమా చేయడం ఇదే అవుతుందన్న అభిప్రాయం వ్యక్తమవుతోంది.