తెలంగాణలో ఎల్‌నినో ప్రభావం.. వర్షాభావంపై హెచ్చరిక

అల్పపీడన ప్రభావంతో గత మూడు, నాలుగు రోజులుగా తెలంగాణలో ఓ మోస్తరు నుంచి భారీ వర్షాలు కురిశాయి. అయితే ఆగస్టు 27 నుంచి రాష్ట్రంలో వర్షపాతం గణనీయంగా తగ్గే అవకాశం ఉందని దీర్ఘకాలిక వాతావరణ సూచనలు చెబుతున్నాయి. ఉత్తర, తూర్పు తెలంగాణలో అక్కడక్కడా తేలికపాటి నుంచి మోస్తరు వర్షాలు కురిసే అవకాశం ఉండగా, మిగిలిన ప్రాంతాల్లో చిరుజల్లులు లేదా పొడి వాతావరణం నెలకొనే అవకాశం ఉంది.

ఈ వర్షాభావ పరిస్థితులు సెప్టెంబర్ మొదటి వారం వరకు, ఆ తర్వాత కూడా కొనసాగే అవకాశం ఉన్నట్లు అంచనా. రాబోయే పది రోజుల్లో ఉష్ణోగ్రతలు పెరగడంతో పాటు ఉక్కపోత వాతావరణం ఏర్పడే అవకాశం ఉందని సూచనలు పేర్కొంటున్నాయి. సెప్టెంబర్ మొదటి వారం నాటికి రాష్ట్ర వర్షాభావ లోటు 20 శాతానికి, హైదరాబాద్‌లో 25 శాతానికి మించే అవకాశం ఉందని అంచనా వేస్తున్నారు. ఈ నేపథ్యంలో నీటిని పొదుపుగా వినియోగిస్తూ ముందస్తు ప్రణాళికలు చేసుకోవాలని సూచిస్తున్నారు.