రూబియో పర్యటనపై గందరగోళమా? మోదీ ప్రభుత్వాన్ని ప్రశ్నించిన రాహుల్ గాంధీ

అమెరికా విదేశాంగ మంత్రి మార్కో రూబియో భారత పర్యటన నేపథ్యంలో కాంగ్రెస్ అగ్రనేత రాహుల్ గాంధీ కేంద్ర ప్రభుత్వంపై విమర్శలు గుప్పించారు. రూబియో పర్యటనపై భారత విదేశాంగ శాఖ అధికారుల్లో గందరగోళం నెలకొందని వ్యాఖ్యానించారు. భారత్‌లోని అమెరికా రాయబారి సెర్గియో గోర్ గురువారం మాట్లాడుతూ.. రూబియో ముంబయిలో భారత ప్రభుత్వ అధికారులతో సమావేశమవుతారని తెలిపారు. ఈ భేటీల్లో భారత విదేశాంగ మంత్రి ఎస్. జైశంకర్ కూడా పాల్గొంటారని భావిస్తున్నట్లు పేర్కొన్నారు. దీనిపై రాహుల్ గాంధీ ‘ఎక్స్’ వేదికగా స్పందిస్తూ.. ప్రధాని నరేంద్ర మోదీ తన విదేశాంగ శాఖ అధికారులకు పర్యటన వివరాలను స్పష్టంగా తెలియజేయాలని వ్యాఖ్యానించారు. తనను అడిగినా వివరాలు చెబుతానంటూ వ్యంగ్యంగా స్పందించారు.

మార్కో రూబియో వచ్చే వారం భారత్‌లో పర్యటించనున్నారు. ఈ పర్యటనలో భాగంగా గుజరాత్‌లోని జామ్‌నగర్‌లో ఉన్న రిలయన్స్ యూనిట్‌ను సందర్శించడంతో పాటు ముంబయిలో వ్యాపారవేత్తలు, ప్రభుత్వ అధికారులతో సమావేశం కానున్నారు. ఈ సందర్భంగా రూబియో, జైశంకర్ మధ్య ద్వైపాక్షిక భేటీ జరిగే అవకాశం ఉందని సమాచారం. భారత్‌–అమెరికా వ్యూహాత్మక భాగస్వామ్యం, ప్రాంతీయ అభివృద్ధి, పరస్పర సహకారం వంటి అంశాలు చర్చకు వచ్చే అవకాశముంది. ఈ పర్యటనకు సంబంధించిన సమావేశాల వివరాలపై రాహుల్ గాంధీ చేసిన వ్యాఖ్యలు రాజకీయంగా చర్చకు దారితీశాయి.