వెనెజువెలా చమురుతో భారత్‌కు 3 బిలియన్‌ డాలర్లు ఆదా - ఎస్‌బీఐ రిపోర్టు

07:36 AM, 4 ఫిబ్రవరి, 2026

అమెరికాతో ట్రేడ్ డీల్‌పై అంగీకారానికి వచ్చిన భారత్‌, వెనెజువెలా నుంచి చమురు కొనుగోళ్లకు సిద్ధమవుతోంది. ఈ నిర్ణయం వల్ల దేశానికి ఏటా సుమారు 3 బిలియన్ డాలర్లు (దాదాపు రూ.27 వేల కోట్లు) ఆదా అయ్యే అవకాశం ఉందని ఎస్‌బీఐ రీసెర్చ్ నివేదిక వెల్లడించింది. రష్యా నుంచి చమురు దిగుమతులను వెనెజువెలాకు మళ్లిస్తే, మొత్తం దిగుమతుల వ్యయం గణనీయంగా తగ్గుతుందని ఈ నివేదిక స్పష్టం చేసింది.

ఎస్‌బీఐ రీసెర్చ్ ప్రకారం, వెనెజువెలా చమురు బ్యారెల్‌పై 10 నుంచి 12 డాలర్ల వరకు డిస్కౌంట్ లభిస్తే, భారత్‌కు అది లాభదాయకమైన ఒప్పందంగా మారుతుంది. రవాణా ఖర్చులు, ఇతర వ్యయాలను తీసేసినా కూడా, ఏటా చమురు దిగుమతుల బిల్లు సుమారు 3 బిలియన్ డాలర్ల మేర తగ్గే అవకాశం ఉందని పేర్కొంది. ప్రస్తుతం వెనెజువెలా ముడిచమురు బ్యారెల్ ధర దాదాపు 51 డాలర్ల వద్ద ట్రేడవుతోందని నివేదిక తెలిపింది.

అయితే, రష్యా నుంచి వెనెజువెలాకు చమురు దిగుమతులను మళ్లించే అంశంలో భారత్‌ అనేక కీలక అంశాలను సమగ్రంగా పరిశీలించాల్సి ఉంటుందని నిపుణులు అభిప్రాయపడుతున్నారు. లభించే డిస్కౌంట్ పరిమాణం, రవాణా వ్యయం, సరఫరాకు పట్టే సమయం, బీమా వంటి ఖర్చులు ఈ నిర్ణయంలో కీలక పాత్ర పోషించనున్నాయి. భౌగోళికంగా వెనెజువెలా భారత్‌కు చాలా దూరంగా ఉండటంతో, అక్కడి నుంచి చమురు రవాణాకు పట్టే సమయం పశ్చిమాసియా దేశాలతో పోలిస్తే సుమారు ఐదు రెట్లు ఎక్కువగా, రష్యాతో పోలిస్తే దాదాపు రెండింతలుగా ఉంటుందని అంచనా వేస్తున్నారు. దీనివల్ల రవాణా వ్యయం భారత్‌కు అదనపు భారం కావచ్చని విశ్లేషకులు చెబుతున్నారు. మరోవైపు, ఉక్రెయిన్ యుద్ధ పరిస్థితులు సద్దుమణిగితే రష్యా నుంచి ప్రస్తుతం లభిస్తున్న డిస్కౌంట్ ధరలు కొనసాగకపోవచ్చన్న అభిప్రాయాలు కూడా వ్యక్తమవుతున్నాయి. ఈ పరిస్థితుల నేపథ్యంలో వెనెజువెలా నుంచి చమురు కొనుగోళ్లపై భారత్ ఆసక్తి చూపడం మరింత ప్రాధాన్యతను సంతరించుకుంటోంది.