ఇక బిల్లుల చెల్లింపులు వాట్సాప్‌లోనే...

బిల్లులు చెల్లించేందుకు వివిధ యాప్‌ల మధ్య మారాల్సిన ఇబ్బందికి చెక్‌ పెట్టేలా వాట్సాప్‌ భారత్‌లో కొత్త ‘బిల్‌ పేమెంట్స్‌’ ఫీచర్‌ను ప్రవేశపెట్టింది. దీని ద్వారా వినియోగదారులు విద్యుత్‌, గ్యాస్‌, నీరు, ఫాస్ట్‌ట్యాగ్‌, బీమా, క్రెడిట్‌ కార్డు బిల్లులు, రుణ చెల్లింపులు తదితర వాటిని నేరుగా వాట్సాప్‌లోనే చెల్లించవచ్చు. భారత్‌ కనెక్ట్‌ నెట్‌వర్క్‌ ఆధారంగా పనిచేసే ఈ సేవలో 30 కేటగిరీలకు చెందిన 22,722 బిల్లర్లు అందుబాటులో ఉన్నారు. ఇంటి, కార్యాలయం లేదా కుటుంబ సభ్యుల కోసం ఒకే బిల్లర్‌ కింద పలు ఖాతాలను కూడా నిర్వహించుకునే సదుపాయం ఉంది.

ఈ ఫీచర్‌ను ఉపయోగించాలంటే వాట్సాప్‌ హోమ్‌ స్క్రీన్‌పై ఉన్న ₹ ఐకాన్‌ను ట్యాప్‌ చేసి, బిల్‌ కేటగిరీ, బిల్లర్‌ను ఎంచుకోవాలి. అనంతరం ఖాతా వివరాలను నమోదు చేసి బిల్‌ మొత్తాన్ని పరిశీలించి.. యూపీఐ, డెబిట్‌ కార్డు లేదా క్రెడిట్‌ కార్డు ద్వారా చెల్లింపు పూర్తి చేయవచ్చు. గతంలో చేసిన చెల్లింపులు, రానున్న బిల్లులను కూడా చూడొచ్చు. తరచుగా ఉపయోగించే బిల్లర్లు, కేటగిరీలు సులభంగా అందుబాటులో ఉండేలా ఈ ఫీచర్‌ను రూపొందించారు. భారత్‌లో ఆండ్రాయిడ్‌, ఐఓఎస్‌ వినియోగదారులకు ఈ సేవను దశలవారీగా అందుబాటులోకి తీసుకురానున్నట్లు వాట్సాప్‌ తెలిపింది.